06.11.2026 | 23:24
Նոյեմբերի 7-ին ՊԵԿ էլեկտրոնային համակարգերը երկու ժամով անհասանելի կլինեն
Իսրայելը Պուտինին թողեց առանց իրանական բալիստիկ հրթիռների. Axios
Քաղաքականություն
28.10.2024 | 23:14
Հոկտեմբերի 26-ի գիշերը իրանական ռազմական օբյեկտներին իսրայելական բանակի հարվածները կարող են զրկել Ռուսաստանին իրանական զենքից, որը Կրեմլը գնում է Ուկրաինայի պատերազմի համար։ Իսրայելի հարձակումը, որին մասնակցում էին ռազմաօդային ուժերի մոտ 100 ինքնաթիռներ, ներառյալ՝ F-35 կործանիչներ, հարվածել են Իրանի հրթիռների արտադրության հիմնական գործարաններին, Axios-ին հայտնել են իրավիճակին ծանոթ երեք աղբյուրներ:
Ըստ նրանց՝ Իսրայելին հաջողվել է շարքից հանել 12 կայանք, որոնք վառելիք էին արտադրում իրանական բալիստիկ հրթիռների համար, որոնք էլ մատակարարվում էին ռուսական բանակին 2024 թվականին։ ԱՄՆ-ի և ԵՄ-ի տվյալներով՝ Fath-360 փոքր հեռահարության հրթիռների առաջին խմբաքանակը Ռուսաստան է մատակարարվել սեպտեմբերին։
Դրանցից առնվազն մի քանիսը, ըստ Ուկրաինայի, ոչնչացվել են Վոլգոգրադի մարզի Կոտլուբան գյուղի մոտ հրթիռա-հրետանային զինանոցին հարվածի հետևանքով։
Իրանը չունի ավերված արտադրական գծերը վերականգնելու սեփական տեխնոլոգիաներտ, ուստի հրթիռների արտադրությունը կարող է դադարեցվել առնվազն մեկ տարով, ասել են Axios-ի աղբյուրները։ Դա նշանակում է, որ լիբանանյան «Հըզբոլլահ» խմբավորումը, Եմենի հութիները և ռուսական բանակը կմնան առանց իրանական հրթիռների, նշել է իսրայելցի մերձավորարևելյան փորձագետ Անշել Պֆեֆերը։
«Իրանը երկար ամիսներ չի կարողանա բալիստիկ հրթիռներ մատակարարել Ռուսաստանին, քանի դեռ չի վերականգնել իր արտադրական հզորությունը»,- ասել է նա։
Թարգմանությունը՝ Տաթև Ֆռանգյանի
