Բաքուն և Իսլամաբադը Ադրբեջան-Թուրքիա-Պակիստան ռազմական համագործակցության ընդլայնման և զորավարժությունների ինտենսիվացման հարցեր են քննարկել

Ադրբեջանի պաշտպանության նախարար Զաքիր Հասանովն ընդունել է Պակիստանի շտաբների պետերի միացյալ կոմիտեի նախագահ, գեներալ Սահիր Շամշադ Միրզայի գլխավորած պատվիրակությանը, որը պաշտոնական այցով գտնվում է Բաքվում։ Ադրբեջանի ՊՆ-ի հաղորդմամբ՝ Հասանովը նշել է, որ երկու երկրների միջև ռազմական կապերը հիմնված են բարեկամական և եղբայրական հարաբերությունների վրա։ Հատկապես ընդգծվել է Ադրբեջանի, Պակիստանի և Թուրքիայի միջև երկկողմ և եռակողմ ռազմական համագործակցության հետագա ընդլայնման կարևորությունը։

Հասանովը նաև Պակիստանի պատվիրակությանը տեղեկացրել է հայ-ադրբեջանական սահմանին ներկա օպերատիվ իրավիճակի մասին։

Միրզան իր հերթին ընդգծել է փոխայցելությունների կարևորությունը ադրբեջանա-պակիստանյան ռազմական համագործակցության զարգացման գործում։ Նա նաև շնորհավորել է «Արցախյան պատերազմում հաղթանակի կապակցությամբ»։

Հանդիպման ընթացքում քննարկվել են ռազմական, ռազմատեխնիկական, ռազմակրթական ոլորտներում երկկողմ համագործակցության հեռանկարները և փոխադարձ հետաքրքրություն ներկայացնող այլ հարցեր։

Ադրբեջանի պաշտպանության նախարարի առաջին տեղակալ, բանակի գլխավոր շտաբի պետ, գեներալ-գնդապետ Քերիմ Վելիևի հետ հանդիպմանն էլ քննարկվել է երկկողմ ռազմական համագործակցության ներկա վիճակը, մտքերի հանգամանալից փոխանակում է տեղի ունեցել համագործակցության հետագա ամրապնդմանն ուղղված միջոցառումների շուրջ։ Ընդգծվել է Ադրբեջանի, Պակիստանի և Թուրքիայի միջև համատեղ երկկողմ և եռակողմ զորավարժությունների ինտենսիվությունը մեծացնելու անհրաժեշտությունը, քննարկվել են հարաբերությունների զարգացման հեռանկարները։

Թարգմանությունը՝ Էմմա Չոբանյանի