20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
Կարեն Սարուխանյանը՝ Գյումրիի քաղաքապետի ՔՊ-ի թեկնածու
Քաղաքականություն
28.10.2024 | 17:03
ԱԺ «Քաղաքացիական պայմանագիր» խմբակցության պատգամավոր Կարեն Սարուխանյանը Factor.am-ի հետ զրույցում չհերքեց, որ Գյումրիի քաղաքապետի ՔՊ-ի թեկնածուն ինքն է լինելու։ Նա, սակայն, չի շտապում իրադարձություններից առաջ ընկնել։ Կարեն Սարուխյանի խոսքով, երբ պաշտոնապես կհաստատվի, որ «Բալասանյան» դաշինքը Գյումրիի քաղաքապետ Վարդգես Սամսոնյանի գլխավորությամբ հրաժարական է տվել, իրենք հայտարարությամբ հանդես կգան։
«Առհասարակ, ՔՊ-ն հետևյալ մոտեցումն ունի․ համայնքներում մենք ունենք տարածքային կազմակերպություններ, որոնց նախագահները դիտարկվում են որպես տվյալ համայնքնում քաղաքական թիմի առաջնորդ, և նմանատիպ իրավիճակներում իրենք են գլխավորում ցուցակը։ Իսկ Գյումրիի պարագայում ես ՔՊ-ի տարածքային կազմակերպության նախագահն եմ։ Տեսնենք՝ իրադարձությունների զարգացումն ինչպես կլինի»,- մեկնաբանեց իշխանական պատգամավորը։
Կարեն Սարուխանյանի խոսքով՝ իր քաղաքական թիմն ինչ որոշում կայացնի, ինքն այն ընդունելու է։ Նա նշեց, որ Գյումրիի մասով ՔՊ-ն արդեն ունի որոշում՝ այդպես էլ հստակ չհայտարարելով այդ որոշման մասին։
Ավելի վաղ Factor.am-ի հետ զրույցում Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը հայտնել էր, որ «Բալասանյան» դաշինքի բոլոր 14 անդամները քաղաքապետի գլխավորությամբ հրաժարվում են մանդատներից, թեև պաշտոնական որևէ հայտարարություն այս պահի դրությամբ դեռ չկա։
Կարեն Սարուխանյանը 2018-ի հունիսից 2019-ի հունվարը եղել է Շիրակի մարզպետ, 2018 թվականի դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի ցուցակով։ Նա եղել է նաև ՀՀ արտակարգ իրավիճակների նախարարի տեղակալ։ Սարուխանյանը փոխնախարարի պաշտոնում նշանակվել էր 2021 թվականին և պաշտոնավարել ընդամենը 3 ամիս։ 2021 թ. ընտրվել է «Քաղաքացիական պայմանագիր» կուսակցության Գյումրիի տարածքային խորհրդի նախագահ։
Մանյա Պողոսյան
