Հյուսիսային Կորեայի մասնակցությունը պատերազմին Պուտինի հուսահատության նշանն է. Ռյուտե

Ավելի քան 600,000 ռուս զինվորական է սպանվել կամ վիրավորվել Ռուսաստանի կողմից Ուկրաինայի դեմ մղվող պատերազմում, իսկ Հյուսիսային Կորեայից զինվորներին ռազմաճակատ բերելը ՌԴ նախագահ Վլադիմիր Պուտինի հուսահատության նշանն է։ DW-ի ռուսական ծառայության փոխանցմամբ՝ այս մասին ասել է ՆԱՏՕ-ի գլխավոր քարտուղար Մարկ Ռյուտեն։

Հոկտեմբերի 28-ին Բրյուսելում կայացած մամուլի ասուլիսում այս հարցի շուրջ խորհրդակցություններից հետո Ռյուտեն հաստատել է հյուսիսկորեական զորքերի, ինչպես նաև դրանց առանձին ստորաբաժանումների՝ Կուրսկի շրջան տեղափոխումը։ Նա կոչ է արել զերծ մնալ Ուկրաինայի դեմ պատերազմին Հյուսիսային Կորեայի մասնակցությունից։

Հյուսիսային Կորեայի զինվորականների մասնակցությունն Ուկրաինա ռուսական ներխուժմանը սպառնալիք է անվտանգության համար ինչպես Հնդկա-խաղաղօվկիանոսյան տարածաշրջանում, այնպես էլ Եվրատլանտյան տարածքում, ընդգծել է Մարկ Ռյուտեն։ Այդ գործողությունները խաթարում են Կորեական թերակղզում խաղաղությունը և աջակցում են Ուկրաինայի դեմ Ռուսաստանի պատերազմին, հավելել է նա։

ՆԱՏՕ-ի ղեկավարի խոսքով՝ հյուսիսկորեական զորքերի տեղափոխումը Ռուսաստան ներկայացնում է Ուկրաինայում պատերազմի զգալի էսկալացիա։ Նա կոչ է արել Մոսկվային և Փհենյանին անհապաղ դադարեցնել այդ գործողությունները։

Ռյուտեն հավելել է՝ ՆԱՏՕ-ն ուշադիր հետևում է իրավիճակի զարգացմանը և դաշինքի շրջանակում ակտիվորեն խորհրդակցում է այդ հարցի շուրջ Ուկրաինայի և Հնդկա-խաղաղօվկիանոսյան տարածաշրջանի գործընկերների հետ։

Թարգմանությունը՝ Տաթև Ֆռանգյանի