09.09.2026 | 13:07
Օդի ջերմաստիճանը Հայաստանում կբարձրանա 6-8 աստիճանով
Վրաստանի խորհրդարանի խոսնակը նախագահ Զուրաբիշվիլիին մեղադրել է երկիրը փլուզելու փորձի մեջ
Քաղաքականություն
28.10.2024 | 14:37
Վրաստանի խորհրդարանի նախագահ Շալվա Պապուաշվիլին հերքել է իշխող «Վրացական երազանք» կուսակցության օգտին ընտրակեղծիքների մեղադրանքները։ Նա նաև հայտարարել է, թե նախագահ Սալոմե Զուրաբիշվիլին ներգրավված է բողոքի ցույցերի կազմակերպման մեջ, որոնք, ըստ նրա, հանգեցնում են երկրի փլուզման։
«Երբ նախագահական նստավայրից ապատեղեկատվություն է տարածվում՝ մարդկանց մոլորեցնելու և նրանց էմոցիաների վրա խաղալու համար, դա, իհարկե, չլսված բան է, և պարզ է, որ տիկին Սալոմե Զուրաբիշվիլին ուղղակիորեն ներգրավված է այն սցենարի մեջ, որը կոչվում է երկրի փլուզում»,- ասել է Շալվա Պապուաշվիլին, որի խոսքերն է մեջբերում IPN-ը:
Հիշեցնենք՝ Վրաստանում խորհրդարանական ընտրությունները տեղի են ունեցել հոկտեմբերի 26-ին։ Կենտրոնական ընտրական հանձնաժողովի տվյալներով՝ իշխող «Վրացական երազանքը» կուսակցությունը հաղթող է ճանաչվել, սակայն երկրի ընդդիմադիր ուժերն ու նախագահը չեն ճանաչում ընտրությունների արդյունքներն ու բողոքի ցույցեր անցկացնելու կոչեր են անում։
Միջազգային դիտորդական կազմակերպությունները ևս ընտրություններում բազմաթիվ խախտումներ են արձանագրել։
Թարգմանությունը՝ Տաթև Ֆռանգյանի
