21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
Բլինքենը դատապարտել է Վրաստանի ընտրություններում միջազգային նորմերի խախտումները ու կոչ արել դրանք հետաքննել
Քաղաքականություն
28.10.2024 | 10:44
«Վրաստանի կենսունակ ժողովրդավարությունը ուժի աղբյուր է 2004 թվականից ի վեր, և երեկվա մասնակցությունը ցույց է տալիս վրացի ժողովրդի նվիրվածությունը ժողովրդավարությանը»,- այս մասին ասվում է Վրաստանում հոկտեմբերի 26-ին տեղի ունեցած խորհրդարանական ընտրությունների կապակցությամբ ԱՄՆ պետքարտուղար Էնթոնի Բլինքենի տարածած հայտարարության մեջ։
«2024 թվականին, սակայն, միջազգային և տեղական դիտորդները նշել են նախընտրական միջավայր, որը նշանավորվել է իշխող կուսակցության կողմից հանրային ռեսուրսների չարաշահմամբ, ձայների գնմամբ և ընտրողների ահաբեկմամբ։ Այս ամենը նպաստել է անհավասար պայմաններին ու խաթարել հասարակության և միջազգային վստահությունը արդար արդյունքի հնարավորության նկատմամբ»,-ասվում է հայտարարության մեջ։
Ըստ Բլինքենի՝ թեև միջազգային և տեղական դիտորդները համակարծիք են, որ ընտրությունների օրը, ընդհանուր առմամբ, լավ կազմակերպված է եղել, սակայն ԱՄՆ-ն նշում է խախտումների և պատահական բռնությունների մասին հաղորդումները։
«Մենք դատապարտում ենք միջազգային նորմերի բոլոր խախտումները և միանում միջազգային և տեղական դիտորդների կոչերին՝ ընտրությունների հետ կապված խախտումների վերաբերյալ բոլոր հաղորդումների ամբողջական հետաքննության վերաբերյալ»,-ասվում է հայտարարության մեջ։
Բլինքենը կոչ է անում Վրաստանի քաղաքական առաջնորդներին հարգել օրենքի գերակայությունը, չեղյալ համարել հիմնարար ազատությունները խաթարող օրենսդրությունը և միասին վերացնել ընտրական գործընթացի թերությունները։
«Վրաստանի եվրոպական և եվրաատլանտյան ինտեգրման նպատակները, որոնք ամրագրված են երկրի սահմանադրությամբ, պահանջում են, որ կառավարությունը հարգի քաղաքացիական հասարակության անդամների իրավունքները և Վրաստանի բոլոր քաղաքացիների հիմնարար ազատությունները»,-ասվում է ԱՄՆ պետքարտուղարի հայտարարության մեջ։
Թարգմանությունը՝ Էմմա Չոբանյանի
