Մենք դարձանք ռուսական հատուկ գործողության ականատեսն ու զոհը․ Վրաստանի նախագահը՝ ընտրությունների մասին

Վրաստանի նախագահ Սալոմե Զուրաբիշվիլին չի ճանաչում նախօրեին անցկացված խորհրդարանական ընտրությունների արդյունքները։ Նա հայտարարել է, որ կանգնած է եվրոպական ընդդիմության կողքին։

Հիշեցնենք, որ երկրի ԿԸՀ-ի հրապարակած տվյալների համաձայն՝ խորհրդարանում հայտնված 4 ընդդիմադիր քաղաքական ուժերը ևս չեն ճանաչել ընտրությունների արդյունքները՝ իշխող «Վրացական երազանք» կուսակցությանը մեղադրելով զանգվածային խախտումների մեջ։ Ընդդիմադիր ուժերին, փաստորեն, միանում է նաև նախագահը, որը Վրաստանի քաղաքացիներին կոչ է արել դուրս գալ փողոց և մասնակցել ընդդիմադիրների հանրահավաքներին, որի մասին ընդդիմությունը հայտարարել է։

«Ես չեմ ճանաչում այս ընտրությունները, քանի որ ճանաչել այս ընտրությունները՝ նշանակում է ճանաչել Ռուսաստանի կողմից Վրաստանի գրավումը, Վրաստանի ենթակայությունը Ռուսաստանին։ Այս ընտրություններում տեղի ունեցան զանգվածային կեղծիքներ, որի ժամանակ կիրառվեցին ընդրակեղծարարության բոլոր հայտնի մեթոդները, ինչպես նաև նոր տեխնոլոգիաներ օգտագործվեցին՝ կեղծիքները քողարկելու նպատակով։ Դա ռուսական հատուկ գործողություն էր և ռուսական ընտրություններ, հիբրիդային պատերազմի նոր մակարդակ»,- հայտարարել է Զուրաբիշվիլին։

Վրաստանի նախագահն այս գործընթացը նաև անվանել է ռուսական նվաճումների նոր տեսակ։ Նա հայտարարել է, որ հաղթել է եվրոպական Վրաստանը և կոչ է արել Վրաստանի արևմտյան գործընկերներին հստակ գործել, լինել Վրաստանի ժողովրդի կողքին՝ հանուն տարածաշրջանում ազատության, ժողովրդավարության և Եվրոպայի:

Վրաստանի ընդդիմությունը պնդում է, որ ընտրություններում հաղթել են 4 ընդդիմադիր ուժերը։

Նախօրեին ընտրություններից անմիջապես հետո Edison Research ընկերությունը հրապարակել է Exit Poll-ի արդյունքները, որոնց համաձայն՝ իշխող «Վրացական երազանք» կուսակցությունը զիջել է 4 ընդդիմադիր քաղաքական ուժերին՝ ստանալով ձայների շուրջ 40%-ը։

Մինչդեռ, Վրաստանի ԿԸՀ-ն հայտարարել է «Վրացական երազանքի»՝ շուրջ 54% քվե ստանալու մասին։