Քաղաքականություն
25.10.2024 | 23:08
Գերմանիայի կանցլեր Օլաֆ Շոլցը հանդես է եկել Ուկրաինայում Ռուսաստանի հրահրած պատերազմի քաղաքական կարգավորման օգտին և աջակցել է Հնդկաստանի միջնորդությանը: Գերմանիայի կառավարության ղեկավարը ելույթ է ունեցել Նյու Դելիում կայացած մամուլի ասուլիսում, որտեղ հանդիպել է Հնդկաստանի վարչապետ Նարենդրա Մոդիի հետ, գրում է DW-ի ռուսական ծառայությունը։
«Ուկրաինայի դեմ Ռուսաստանի ագրեսիվ պատերազմը շատ առումներով ազդում է նաև Գերմանիայի ու Հնդկաստանի վրա։ Ոչ ոք չի կարող աչք փակել այս հակամարտության վրա։ Դրա համար էլ ես վճռականորեն արտահայտվում եմ, որ Հնդկաստանը հանդես գա երկարատև ու արդար խաղաղության օգտին»,- ասել է Շոլցը։
Նա նշել է, որ ողջունում է Հնդկաստանի պատրաստակամությունը՝ օգտագործելու իր ամուր կապերը բոլոր կողմերի հետ՝ նպաստելու հակամարտության քաղաքական լուծմանը:
«Այս պատերազմը, որը մոլեգնում է արդեն այնքան երկար ու այնքան կյանքեր է խլում, պետք է վերջապես ավարտվի։ Ուկրաինայի ամբողջականությունն ու ինքնիշխանությունը պետք է պահպանվեն։ Սա այն է, ինչի օգտին մենք հանդես ենք գալիս»,- եզրափակել է Շոլցը:
AP գործակալության հաղորդմամբ՝ մինչ այժմ Մոդին խուսափում էր Ռուսաստանին դատապարտել Ուկրաինա լայնամասշտաբ ներխուժման համար և կենտրոնացել է խաղաղ կարգավորման վրա։ Ավելի վաղ Մոդին հերթական անգամ հայտարարել է, որ իր երկիրը պատրաստ է միջնորդ լինել Մոսկվայի ու Կիևի միջև ուկրաինական պատերազմին վերջ տալու բանակցություններում։
«Մենք լիովին աջակցում ենք խաղաղության և կայունության շուտափույթ վերականգնմանը»,- ասել է նա Կազանում ՌԴ նախագահ Վլադիմիր Պուտինի հետ հանդիպման ժամանակ։
Թարգմանությունը՝ Էմմա Չոբանյանի
