18.07.2026 | 18:00
«Ֆուռերի մեջ բեռնված ձուկը փչանում է, ի՞նչ անենք»․ ՌԴ-ի սահմանափակումներն ու ԵՄ-ի ընձեռած հնարավորությունը․ ՏԵՍԱՆՅՈՒԹ
Լուկաշենկոն սպառնացել է պատերազմով, եթե ՌԴ-ն փորձի իրեն միացնել Բելառուսը
Քաղաքականություն
25.10.2024 | 14:47
Ռուսաստանի որոշ «բարձրաստիճան շրջանակներ ձգտում են» միացնել Բելառուսը, սակայն դրա փորձը կվերածվի պատերազմի։ «Իզվեստիա»-ին տված հարցազրույցում այս մասին ասել է Բելառուսի նախագահ Ալեքսանդր Լուկաշենկոն։
«Դուք ավելի փոքր եք, մենք ավելի մեծ ենք, իսկ մեր տնտեսությունն այսպիսին է, այնպիսին է։ Մենք ձեզ կշարունակենք օգնել, մտեք ՌԴ կազմի մեջ․․․ Այսպես հարցը դնել չի կարելի։ Դա անհնարին է և անիրականանալի։ Վախենում եմ անգամ ասել, որ դա պատերազմ է»,- հայտարարել է Լուկաշենկոն։
Նա ասել է՝ չի հասկանում, թե ինչու պետք է Բելառուսը միացվի Ռուսաստանին, քանի որ երկրներն արդեն միութենական պետություն են ստեղծել։
«Մենք կարող ենք կառուցել հարաբերություններ, որոնք կլինեն ավելի սերտ և ամուր, քան ունիտար պետությունում: Եվ ոչ ոք ոչ մեկից չի նեղանա»,- պարզաբանել է Լուկաշենկոն։
Նա նշել է, որ «այսօր կարելի է ինչ-որ բան գրավել», բայց «խելացի, իմաստուն քաղաքական գործիչը» միշտ պետք է մտածի՝ «Իսկ հետո՞»։
«Սա միջնադար չէ, երբ տարածք ես գրավում, հարկեր ես վճարում, և դա լավ է․ աշխարհը փոխվել է, աշխարհն ուրիշ է։ Ուստի պետք չի ինքներդ ձեր առաջ հիմար նպատակներ դնեք, միշտ պետք է մտածեք, թե ինչ կլինի հետո»,- ասել է Լուկաշենկոն։
Բելառուսի ղեկավարը նաև վստահություն է հայտնել, որ Ռուսաստանի նախագահ Վլադիմիր Պուտինը երբեք «ուրիշի տարածք գրավելու խնդիր չի ունեցել»։
Թարգմանությունը՝ Տաթև Ֆռանգյանի
