Երևանում առաջին անգամ կանցկացվի ֆլեյտայի միջազգային փառատոն

Հոկտեմբերի 26-30-ը առաջին անգամ Երևանում կանցկացվի ֆլեյտայի միջազգային փառատոն: Այն իրականացվում է Հայաստանի պետական ֆիլհարմոնիայի, Մոսկվայի ֆլեյտայի կենտրոնի և Գոնչարով ստուդիայի համագործակցությամբ։

Նախագծի շրջանակերում 4 օր շարունակ «Առնո Բաբաջանյան» համերգասրահում տեղի կունենան համերգներ, վարպետության դասեր, դասախոսություններ և ֆլեյտայի համաշխարհային ապրանքանիշերի ցուցահանդես-աշխատարան:

Փառատոնի հյուրերն են՝ Ֆրանկֆուրտի օպերային նվագախմբի մենակատար, Ժնևի ֆլեյտայի միջազգային մրցույթի 1-ին մրցանակի դափնեկիր (2023թ.) Ելիզավետա Իվանովան (Ռուսաստան / Գերմանիա), Բարոկ ֆլեյտահար (տրավերս ֆլեյտա) Լայպցիգի կոնսերվատորիայի պրոֆեսոր, Utrecht Early Music Festival, Musicora Paris, Avignon Festival, Stockholm Early Music, Innsbrucker Festwochen der Alten Musik փառատոների մասնակից Բենեդեկ Չալոգը (Հունգարիա), Ղազախստանի պետական  ակադեմիական սիմֆոնիկ նվագախմբի մենակատար, Ղազախստանի պետական ֆիլհարմոնիայի մենակատար, Concours international du jeune flutiste միջազգային մրցույթի հաղթող, Marcel Bleustein ֆրանսիական հեղինակավոր հիմնադրամի մրցանակակիր Երժան Կուշանովը (Ղազախստան), Հայաստանի ազգային ֆիլհարմոնիկ նվագախմբի մենակատար և կոնցերտմայստեր, ֆլեյտայի բազմաթիվ միջազգային մրցույթների դափնեկիր և ժյուրի Նարեկ Ավագյանը (Հայաստան), բազմաթիվ հեղինակավոր պատանեկան և երիտասարդական միջազգային մրցույթների, այդ թվում՝ Տոկիոյի ֆլեյտայի միջազգային մրցույթի, Շչելկունչիկ հեռուստատեսային մրցույթի, Գնեսինների անվան ֆլեյտայի միջազգային մրցույթի դափնեկիր Էլեն Վիրաբյանը (Ռուսաստան / Հայաստան), Հայաստանի ազգային ֆիլհարմոնիկ նվագախմբի ֆլեյտահար, Երևանի սիմֆոնիկ նվագախմբի կոնցերտմեյստեր, Վերածնունդ  քառյակի ֆլեյտահար, ՀԲԸՄ «Երաժշտական Հայաստան» նախագծի հրավիրյալ դասախոս Արման Աբրահամյանը (Հայաստան)․ Վարշավայի ուսուցիչ֊-կատարողների  միջազգային մրցույթի հաղթող, Գնեսինների անվան մասնագիտական երաժշտական  դպրոց֊ քոլեջի դասախոս Զառա Փարվանյանը (Ռուսաստան / Հայաստան)։

Փառատոնային համերգները տեղի կունենան հոկտեմբերի 27-ին, 28-ին, 29-ին «Առնո Բաբաջանյան» համերգասրահում։

Փառատոնի օրերին վարպետության դասեր կանցկացնեն Ելիզավետա Իվանովան, Բենեդեկ Չալոգը, Նարեկ Ավագյանը, Զառա Փարվանյանը և Երժան Կուշանովը:

Տեղի կունենան դասախոսություններ Լայպցիգի կոնսերվատորիայի պրոֆեսոր Բենեդեկ Չալոգի ղեկավարությամբ:

Համերգային դահլիճի ճեմասրահում կանցկացվի ֆլեյտաների և ակսեսուարների ցուցահանդես, Ֆլեյտայի մոսկովյան կենտրոնի կողմից կներկայացվեն համաշխարհային հայտնի բրենդների նմուշներ։

Փառատոնի գեղարվեստական ղեկավար՝ «Flute Bridges» միջազգային նախագծի հիմնադիր՝ Վարդան Վիրաբյան: