11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Ալիևը հայտարարել է, թե Ադրբեջանը դարձել է Եվրասիայի կարևոր տրանսպորտային և լոգիստիկ կենտրոններից մեկը
Քաղաքականություն
24.10.2024 | 21:24
Ադրբեջանը Եվրասիայի տրանսպորտային և լոգիստիկ կենտրոն է, նրա տարածքում հաջողությամբ գործում են «Հյուսիս-Հարավ» և «Արևելք-Արևմուտք» տրանսպորտային միջոնցքների բոլոր հատվածները։ Այս մասին ԲՐԻԿՍ+ գագաթնաժողովում ունեցած ելույթում հայտարարել է Ադրբեջանի նախագահ Իլհամ Ալիևը, գրում են ադրբեջանական լրատվամիջոցները։
«Օգտագործելով իր աշխարհագրական դիրքը և ստեղծելով ժամանակակից ենթակառուցվածքներ՝ Ադրբեջանը դարձել է Եվրասիայի կարևոր տրանսպորտային և լոգիստիկ կենտրոններից մեկը։ Մեր տարածքով են անցնում «Հյուսիս-Հարավ» և «Արևելք-Արևմուտք» տրանսպորտային միջանցքները։ Այդ տրանսպորտային երթուղիների բոլոր հատվածները հաջողությամբ գործում են Ադրբեջանի տարածքում»,- ասել է նա։
Ալիևը նաև հայտարարել է, թե Ադրբեջանը միջազգային հարաբերություններում բազմակողմանիության սկզբունքի ակտիվ ջատագովն է։ Նա ասել է, որ իր երկիրը դա հստակ ցույց է տվել Չմիավորման շարժման նախագահության ժամանակ՝ 2020-2023 թվականներին։
Ադրբեջանի ղեկավարն ասել է, որ իր երկիրն արդեն իսկ նպաստում է գլոբալ հարավի և գլոբալ հյուսիսի միջև կլիմայական համագործակցությանը։
«Շուրջ 200 երկրների միաձայն որոշումը՝ Ադրբեջանում ընդունելու COP29-ը, մեր քաղաքականության նկատմամբ հարգանքի և աջակցության հստակ վկայությունն է։ Մենք կձգտենք հասնել փոխըմբռնման ինչպես կլիմայի փոփոխության, այնպես էլ գլոբալ անվտանգության, միջազգային իրավունքի գերակայության, միմյանց գործերին չմիջամտելու և փոխադարձ հարգանքի հարցերի շուրջ»,- նշել է Ալիևը։
Թարգմանությունը՝ Էմմա Չոբանյանի
