Քամալա Հարիսը Թրամփին «ֆաշիստ» է անվանել

ԱՄՆ նախագահական ընտրություններից երկու շաբաթ առաջ Դեմոկրատական կուսակցության թեկնածու Քամալա Հարիսը կտրուկ ուժեղացրել է բանավոր հարձակումները իր հանրապետական ​​մրցակից Դոնալդ Թրամփի նկատմամբ։ Նախօրեին չկողմնորոշված ​​ընտրողների հետ հանդիպմանը, որը կազմակերպել էր CNN մեդիաընկերությունը, Հարրիսը Թրամփին ֆաշիստ է անվանել, գրում է DW-ի ռուսական ծառայությունը։

Հաղորդավարի հարցին՝ արդյո՞ք Հարիսը Թրամփին «ֆաշիստ» է համարում, նա առանց վարանելու պատասխանել է՝ «Այո»։

Այս հարցը հնչում է այն բանից հետո, երբ Թրամփի նախընտրական շտաբի նախկին ղեկավար Ջոն Քելլին The New York Times-ին ասել էր, որ կարծում է՝ Թրամփը համապատասխանում է «ֆաշիստի ընդհանուր սահմանմանը»՝ ծայրահեղ աջ, ավտորիտար, ծայրահեղ ազգայնական գաղափարախոսության հետևորդի՝ բռնապետ առաջնորդին։

Հարիսը նշել է, որ Քելլին իր հարցազրույցով «աղետի ազդանշան է ուղարկել ամերիկացի ժողովրդին»՝ ցույց տալու, թե ինչ կարող է լինել, եթե Թրամփը վերադառնա Սպիտակ տուն:

«Ես հավատում եմ, որ Դոնալդ Թրամփը սպառնալիք է Ամերիկայի բարեկեցության և անվտանգության համար»,- ընդգծել է Քամալա Հարիսը:

Նա նաև հայտարարել է, որ Թրամփն «ավելի անկայուն է» և «ոչ պիտանի նախագահ լինելու համար»: Նա նաև հիշեցրել է Թրամփի նախկին վստահված անձանց նախազգուշացումների մասին, որոնք ասել են, որ նա արհամարհում է ԱՄՆ Սահմանադրությունը և երբեք չպետք է այլևս նախագահ դառնա:

Դոնալդ Թրամփը ծաղրով է արձագանքել Հարիսի խոսքերին։

«Հարիսը զգում է, որ պարտվում է, այն էլ՝ բավական զգալի։ Դրա համար ավելի է կոշտացնում իր հռետորաբանությունը  և հասնում նրան, որ ինձ անվանում է Հիտլեր։ Հարիսն ինքն է ժողովրդավարության համար սպառնալիք և պիտանի չէ լինել Միացյալ Նահանգների նախագահ»,- գրել է Թրամփը իր Truth սոցիալական ցանցում։

Թարգմանությունը՝ Էմմա Չոբանյանի