23.06.2026 | 16:57
Փաշինյանի որոշմամբ ձևավորվել են առողջության համընդհանուր ապահովագրության հիմնադրամի մրցութային հանձնաժողովները
ՌԴ-ի և Հյուսիսային Կորեայի միջև կնքված համաձայնագրում գաղտնի կետ կա Ուկրաինա հյուսիսկորեական զորքերի ուղարկման վերաբերյալ․ WSJ
Քաղաքականություն
23.10.2024 | 15:08
Ամերիկյան The Wall Street Journal-ը, հղում անելով ռուսական հետախուզության նախկին աշխատակցին, հայտնում է, որ Ռուսաստանն ու Հյուսիսային Կորեան գաղտնի պայմանավորվել են շուրջ 1000 հյուսիսկորեացի զինվորների ուղարկել Ուկրաինա, փոխանցում է BBC-ի ռուսական ծառայությունը։
Ըստ լրատվամիջոցի զրուցակցի՝ Մոսկվայի և Փհենյանի միջև համաձայնագրում, որը երկու երկրների ղեկավարները ստորագրել են այս տարվա ամռանը, ներառվել է գաղտնի կետ, որը թույլ է տալիս Հյուսիսային Կորեային ռազմական անձնակազմ ուղարկել Ուկրաինա։ Աղբյուրը պնդում է, որ ԿԺԴՀ-ի զինվորականները կմեկնեն Ուկրաինա՝ «Ռուսաստանի փորձից ուղղակիորեն սովորելու, թե ինչպես պատերազմ վարել»։
«Հյուսիսկորեական զորքերի մեծ մասը դեռևս մնում է զգալի առաջնագծից հեռու, նրանց ցույց է տրվում, թե ինչպես են ռուսները լուծում նյութատեխնիկական հարցերը և վարում ռազմաճակատի մարտավարությունը, ինչպես նաև նոր պատկերացումներ են ստանում ժամանակակից անօդաչու թռչող սարքերի պատերազմի մասին»,- ասվում է հրապարակման մեջ։
Ամերիկյան անանուն աղբյուրները WSJ-ին հայտնել են նաև, որ, ըստ իրենց ենթադրությունների, ԿԺԴՀ-ի զինվորականներն իսկապես պատրաստվում են Ռուսաստանում, սակայն այս ապացույցը չի կարելի անվանել հարյուր տոկոս, և պարզ չէ, թե կոնկրետ քանի՞ զինվորականի մասին է խոսքը և որո՞նք են նրանց խնդիրները։
WSJ-ն, վկայակոչելով Սեուլի Կունմին համալսարանի առաջատար հետազոտող Ֆյոդոր Տերտիցկիին, նշում է, որ Հյուսիսային Կորեան նախկինում ռազմական անձնակազմ է ուղարկել տարբեր պատերազմների, այդ թվում՝ Եգիպտոսի ռազմաօդային ուժերի համար օդաչուների, ինչպես նաև «տասնյակ զինվորների» Սիրիա և Զիմբաբվե։ Սակայն, նրա խոսքով, հազարավոր զինվորականների ուղարկելը վտանգ է ներկայացնում ԿԺԴՀ իշխանությունների համար, քանի որ նրանք կարող են հանձնվել կամ փախչել, նաև կարող են ենթարկվել արտաքին գաղափարական ազդեցությունների։
Ավելի վաղ էլ Հարավային Կորեայի հետախուզությունը հայտնել էր, որ Հյուսիսային Կորեան որոշել է 12 հազար զինվորականի ուղարկել՝ ուկրաինական պատերազմին մասնակցելու համար։
Թարգմանությունը՝ Էմմա Չոբանյանի
