26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
Սեուլը պնդում է, որ Հյուսիսային Կորեան որոշել է 12,000 զինվորականի ուղարկել՝ Ուկրաինայի դեմ պատերազմին մասնակցելու համար
Քաղաքականություն
18.10.2024 | 16:36
Հարավային Կորեայի հետախուզական գործակալությունը հայտնել է, որ Հյուսիսային Կորեան որոշել է 12 հազար զինվորականի ուղարկել ուկրաինական պատերազմին մասնակցելու համար։ Այս մասին հայտնում է հարավկորեական Yonhap լրատվական գործակալությունը, փոխանցում է BBC-ի ռուսական ծառայությունը։
Նախօրեին Ուկրաինայի նախագահ Վլադիմիր Զելենսկին հայտարարել էր, որ Հյուսիսայից Կորեայից 10 հազար զինվորականներ կարող են ներգրավվել պատերազմում։ Ռուսաստանն այս լուրերը կեղծ է անվանում։
Հարավային Կորեայի նախագահ Յուն Սոկ Յոլն էլ ուրբաթ չնախատեսված անվտանգային հանդիպում է անցկացրել հետախուզության, ռազմական և ազգային անվտանգության հիմնական պաշտոնյաների հետ՝ քննարկելու Հյուսիսային Կորեայի զորքերի մասնակցությունը Ուկրաինայի դեմ Ռուսաստանի պատերազմում։
«Հանդիպման մասնակիցները կիսել են այն կարծիքը, որ ներկայիս իրավիճակը, երբ Ռուսաստանի և Հյուսիսային Կորեայի միջև սերտ կապերը դուրս են եկել ռազմական բեռների տեղաշարժի շրջանակից, անվտանգության լուրջ վտանգ են ներկայացնում ոչ միայն մեր երկրի, այլև միջազգային հանրության համար»,- ասվում է նախագահի աշխատակազմի տարածած հայտարարության մեջ:
Նշվում է, որ Հարավային Կորեայի պաշտոնյաներն ասել են, թե հավանական է՝ Հյուսիսային Կորեայի որոշ զորքեր գտնվել են Ռուսաստանում և ներգրավված են Ուկրաինայի հետ պատերազմում, սակայն հստակ պատասխան չեն տվել նման տեղակայման բնույթի կամ մասշտաբների մասին։
Հյուսիսային Կորեան և Ռուսաստանը զգալիորեն ամրապնդել են ռազմական կապերն անցյալ տարվա ընթացքում։
Հարավային Կորեայի և ԱՄՆ-ի պաշտոնյաները հայտարարել են, որ Հյուսիսային Կորեան բալիստիկ հրթիռներ ու այլ զինամթերք է մատակարարում Ռուսաստանին: Մոսկվան և Փհենյանը հերքում են այս տեղեկությունները։ Կրեմլը նաև հերքել է Հարավային Կորեայի այն պնդումները, թե Հյուսիսային Կորեան կարող է զորքեր ուղարկել՝ օգնելու Ռուսաստանին Ուկրաինայի դեմ պատերազմում։
Թարգմանությունը՝ Էմմա Չոբանյանի
