Զելենսկին ասել է, որ էներգետիկ օբյեկտների վրա հարձակումներից փոխադարձ հրաժարումը կարող է «ավարտել պատերազմի թեժ փուլը»․ FT

Ուկրաինայի նախագահ Վլադիմիր Զելենսկին հայտարարել է, որ Ռուսաստանի և Ուկրաինայի միջև էներգետիկ ենթակառուցվածքների վրա հարձակումները դադարեցնելու ասին փոխադարձ համաձայնությունը կարող է պատերազմի ավարտին ուղղված քայլ լինել, գրում է բրիտանական Financial Times-ը։

«Առաջին գագաթնաժողովի ժամանակ մենք տեսանք, որ էներգետիկ անվտանգության վերաբերյալ որոշում կարող է կայացվել։ Այսինքն՝ մենք չենք հարձակվում իրենց էներգետիկ ենթակառուցվածքի վրա, նրանք՝ մեր։ Սա կարո՞ղ է հանգեցնել պատերազմի թեժ փուլի ավարտին։ Կարծում եմ՝ այդպես է»,- լրագրողներին ասել է Զելենսկին։

Նախկինում Ուկրաինայի նախագահը բազմիցս անիմաստ էր անվանել բանակցությունները Ռուսաստանի նախագահ Վլադիմիր Պուտինի հետ, քանի որ նա խաղաղության պատրաստակամություն չի դրսևորել և կարող է ռազմական գործողությունների ցանկացած դադար օգտագործել իր օգտին։

Ամերիկյան Washington Post-ը, հղում անելով իր աղբյուրներին, հայտնում է, որ այս տարվա օգոստոսին Ուկրաինան և Ռուսաստանը պետք է պատվիրակություններ ուղարկեին Դոհա՝ երկու կողմերի էներգետիկ ենթակառուցվածքների վրա հարձակումները դադարեցնելու վերաբերյալ համաձայնագրի կնքման անուղղակի բանակցությունների համար, ինչը հավասարազոր կլինի մասնակի զինադադարի և երկու կողմերին շունչ քաշելու հնարավորություն կտա։

Սակայն, ըստ պարբերականի զրուցակիցների, անուղղակի բանակցությունները, որոնցում Կատարը հանդես էր գալիս որպես միջնորդ և առանձին հանդիպում էր ուկրաինական և ռուսական պատվիրակությունների հետ, խաթարվեցին Կուրսկի շրջան Ուկրաինայի անսպասելի ներխուժմամբ:

Ավելի ուշ թե՛ ուկրաինացի, թե՛ ռուսաստանցի պաշտոնյաներն այս հրապարակումն իրականությանը չհամապատասխանող անվանեցին։

Թարգմանությունը՝ Տաթև Ֆռանգյանի