11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Մամուլի ազատության խմբերը դատապարտում են Թուրքիայում Açık Radyo-ն փակելու որոշումը՝ եթերում Հայոց ցեղասպանության հիշատակման համար
Քաղաքականություն
22.10.2024 | 23:29
Մամուլի ազատության և քաղաքացիական հասարակության 64 կազմակերպություններ դատապարտել են Թուրքիայի որոշումը՝ չեղարկել 1995 թվականին հիմնադրված Açık Radyo անկախ ռադիոկայանի վերգետնյա հեռարձակման արտոնագիրը։ Այս մասին ասվում է Freedom House-ի հայտարարության մեջ, որին վկայակոչում է Stockholm Center for Freedom-ը։
Ստորագրողները՝ Մամուլի միջազգային ինստիտուտի (IPI) գլխավորությամբ, կոչ են արել Թուրքիայի իշխանություններին վերականգնել ռադիոյի արտոնագիրը։ Կոալիցիայի կազմում ընդգրկված են Freedom House-ը, Լրագրողների պաշտպանության կոմիտեն (CPJ), PEN International-ը և Լրագրողների եվրոպական ֆեդերացիան (EFJ):
«Մենք կոչ ենք անում թուրքական իշխանություններին կատարել իրենց պարտավորությունները՝ պաշտպանելու մամուլի և արտահայտվելու ազատությունը՝ Թուրքիայի Հանրապետության Սահմանադրությանը և Մարդու իրավունքների եվրոպական կոնվենցիային համապատասխան։ Մենք կոչ ենք անում անհապաղ վերականգնել Açık Radyo-ի հեռարձակման արտոնագիրը՝ ապահովելով, որ լրատվամիջոցները Թուրքիայում կարողանան գործել և հնարավորություն ունենան քննարկումներ անցկացնել հանրային հետաքրքրություն ներկայացնող հարցերի շուրջ՝ չվախենալով հաշվեհարդարից»,- ասվում է հայտարարության մեջ։
Իրավապաշտպան կազմակերպություններն ընդգծել են, որ որոշումը խարխլում է ԶԼՄ-ների բազմակարծությունը և անկախ տեղեկատվության հանրային հասանելիությունը: Նրանք կոչ են արել միջազգային հանրությանն աջակցել ռադիոկայանին՝ ընդգծելով Թուրքիայում մամուլի ազատության վրա ավելի լայն ազդեցությունը։
«Açık Radyo-ն երեք տասնամյակների ընթացքում վճռորոշ ձայն է հանդիսացել՝ հարթակ առաջարկելով կլիմայի փոփոխությունից մինչև հանրային առողջություն հարցերի շուրջ բանավեճերի համար։ Այս հարթակը լռեցնելը հարված է Թուրքիայի ժողովրդավարական կառուցվածքին»,- ասվում է հայտարարության մեջ:
Հիշեցնենք, որ հոկտեմբերի 16-ին Açık Radyo-ն հայտարարել էր, որ ռադիոկայանը փակվում է իշխանությունների կողմից՝ վեց ամիս անց այն բանից հետո, երբ հյուրերից մեկը եթերում խոսել էր Հայոց ցեղասպանության մասին։
Թարգմանությունը՝ Էմմա Չոբանյանի
