Թուրքիայի իշխանությունները ռադիոկայան են փակել` եթերում Հայոց ցեղասպանության մասին հիշատակման պատճառով

Ստամբուլի Açık Radyo-ն հայտարարել է, որ ռադիոկայանը փակվում է իշխանությունների կողմից՝ վեց ամիս անց այն բանից հետո, երբ հյուրերից մեկը եթերում խոսել է Հայոց ցեղասպանության մասին։ Ռադիոկայանը, միաժամանակ հայտարարում է, որ ճանապարհ կգտնի աշխատանքը շարունակելու համար։

«Açık Radyo-ի վերգետնյա հեռարձակումն այսօր կդադարեցվի։ Հետևե՛ք զարգացումներին»,- ասվում է ռադիոկայանի X-ի միկրոբլոգում արված գրառման մեջ։

Ավելի վաղ ռադիոկայանը հայտարարել էր, որ «քաղաքացիական ձայների ուժեղացուցիչ է դարձել շատ ոլորտներում՝ կլիմայական և բնապահպանական գործողություններից մինչև հանրային առողջություն, գենդերային հավասարությունից մինչև բազմամշակութայնություն։

«Açık Radyo-ն չի սահմանափակվել միայն ռադիոհաճախականություններով, և կասկած չկա, որ այն կշարունակի գործել որպես անկախ լրատվամիջոց»,- ասվում է հայտարարության մեջ:

Հիշեցնենք, որ Թուրքիայի Ռադիոյի և հեռուստատեսության բարձրագույն խորհուրդն (RTÜK) ավելի վաղ չեղարկել էր Açık Radyo անկախ ռադիոկայանի լիցենզիան։ Որոշումը կայացվել էր այն բանից հետո, երբ ռադիոկայանը տուգանվել էր ապրիլի 24-ին հաղորդման ընթացքում Հայոց ցեղասպանության մասին հիշատակման համար։

Լիցենզիայի չեղարկումը հիմնավորվել էր ռադիոկայանի կողմից RTÜK-ի սահմանած նախկին պատժամիջոցները չկատարելու պատճառով, որոնք ներառում էին վարչական տույժեր և հեռարձակման հնգօրյա կասեցում: Չնայած տուգանքների վճարմանը՝ Açık Radyo-ն շարունակել է հեռարձակվել, ինչը RTÜK-ը համարել է պատժամիջոցներով սահմանված պայմանների խախտում։

Լիզենզիայի չեղարկմանը հանգեցրած միջադեպը տեղի էր ունեցել ապրիլի 24-ին Açık Radyo-ի «Açık Gazete» հաղորդման ժամանակ, որտեղ հյուրը հիշատակել էր Հայոց ցեղասպանության մասին՝ հետևյալ ձևակերպմամբ․ «Հայկական, այսինքն՝ օսմանյան հողերում տեղի ունեցած տեղահանությունն ու ջարդերը, ջարդերի 109-րդ տարելիցը, որը կոչվում է ցեղասպանություն։ Գիտեք, որ այս տարի էլ արգելվել է Հայոց ցեղասպանության հիշատակի միջոցառումը»։

Էմմա Չոբանյանի