ՄԻԵԴ-ը պարտավորեցրել է ՌԴ-ին փոխհատուցում վճարել «օտարերկրյա գործակալներ» հայտարարված անձանց և կազմակերպություններին

Մարդու իրավունքների եվրոպական դատարանը (ՄԻԵԴ) որոշում է կայացրել Ռուսաստանում «օտարերկրյա գործակալներ» ճանաչված անձանց և կազմակերպությունների համատեղ հայցի վերաբերյալ, գրում է Current time-ը։

Դատարանը Ռուսաստանի իշխանություններից պահանջել է նրանց վճարել մինչև 955 հազար եվրո՝ որպես նյութական վնասի փոխհատուցում, մինչև 10 հազար եվրո՝ ոչ նյութական վնասի և 850 եվրո՝ դատական ​​ծախսերի համար։

Փոխհատուցում ստացողների թվում են բլոգեր Յուրի Դուդը, քաղաքագետ Եկատերինա Շուլմանը, քաղաքական գործիչ Լյուբով Սոբոլը, «Проект», «Важные истории» և «Медиазона» լրատվամիջոցների ներկա ու նախկին աշխատակիցները, «Դոժդ» հեռուստալիքը, The Insider-ը, Եվգենյա Ալբացը և նրա «Նոր ժամանակներ» պարբերականը, «Մեմորիալ» իրավապաշտպան կենտրոնն ու նրա խորհրդի նախագահ Ալեքսանդր Չերկասովը, այլք։

Միակ դիմումատուն, ում հայցը ՄԻԵԴ-ը չի ընդունել, Ռոստովի քաղաքային «Էկո-Լոգիկա» հասարակական կազմակերպության նախագահ Ֆյոդոր Միկուշինն է։ Ըստ դատարանի՝ նա շատ ուշ է սկսել վիճարկել ռուսական ուժային կառույցների որոշումները։

Դատարանի որոշման համաձայն՝ Ռուսաստանը խախտել է Մարդու իրավունքների և հիմնարար ազատությունների պաշտպանության մասին կոնվենցիայի 10-րդ և 11-րդ հոդվածները։ Դրանք ազատ արտահայտվելու իրավունքի ու խաղաղ հավաքների և միավորումների ազատության իրավունքի վերաբերյալ հոդվածներն են:

Դատարանը նաև վճռել է, որ «օտարերկրյա գործակալների» առնչությամբ խախտվել է կոնվենցիայի 8-րդ հոդվածը՝ անձնական և ընտանեկան կյանքի իրավունքը հարգելու մասին։

Դատարանը որոշել է, որ առավելագույն փոխահատուցումը վճարվելու է «Ազատ Եվրոպա/Ազատություն» ռադիոկայանին՝ 955,440 եվրո նյութական վնասների համար և 850 եվրո՝ ոչ նյութական ծախսերի համար:

Սա ՄԻԵԴ-ի երկրորդ որոշումն է այն անձանց բողոքների վերաբերյալ, որոնց Ռուսաստանի իշխանությունները ճանաչել են որպես «օտարերկրյա գործակալներ»։ Առաջին անգամ դիմողները մասնավոր անձինք են, նախորդ դեպքում դիմել էին կազմակերպությունները։

Թարգմանությունը՝ Էմմա Չոբանյանի