Ալիևի օգնականը հայտարարել է, թե Ադրբեջանը կարող է ԲՐԻԿՍ-ին լրացուցիչ դինամիկա հաղորդել

Ադրբեջանը կարող է լրացուցիչ դինամիկա հաղորդել ԲՐԻԿՍ-ին, այդ կազմակերպությանն անդամակցությունը բազմակողմ հարթակի անդամ երկրների հետ Ադրբեջանի լավ հարաբերությունների շարունակությունն է։ Այս մասին չինական «Սինհուա» գործակալությանը տված հարցազրույցում հայտարարել է Ադրբեջանի նախագահ Իլհամ Ալիևի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։

Տեղական լրատվամիջոցների փոխանցմամբ՝ Հաջիևը նշել է, թե ԲՐԻԿՍ-ն ինստիտուտ է, որը ծառայում է բազմակարծությանը և միջազգային հարաբերությունների համակարգի ժողովրդավարացմանը, նպաստում է գլոբալ կառավարման բարելավմանն ու միջազգային կարգի զարգացմանն ավելի արդար ուղղությամբ։

«Մենք կարծում ենք, որ ԲՐԻԿՍ-ի երկրները, հավատարիմ լինելով միջազգային իրավունքին, տարածքային ամբողջականության, ինքնիշխանության և միմյանց ներքին գործերին չմիջամտելու սկզբունքներին, պահպանելով փոխշահավետ հարաբերություններ պետությունների միջև և կանխելով քաղաքական օրակարգի մենաշնորհայնացումը միայն մեկ խմբի կողմից՝ նպաստում են գլոբալ կառավարման բարելավմանը և միջազգային կարգի զարգացմանն ավելի արդար ուղղությամբ»,- ասել է Հաջիևը։

Նա նշել է, որ «ԲՐԻԿՍ-ին անդամակցելու՝ Ադրբեջանի ցանկությունը երկրի ակտիվ անկախ արտաքին քաղաքականության տրամաբանական շարունակությունն է»։ Ըստ Հաջիևի՝ «Ադրբեջանը պատրաստ է իր ներդրումն ունենալ բազմավեկտոր աշխարհում՝ այլ համախոհ երկրների հետ սերտ համագործակցությամբ»։

Պաշտոնական Բաքուն ավելի վաղ հայտարարել էր, որ ցանկանում է դառնալ ԲՐԻԿՍ-ի լիիրավ անդամ։ Ադրբեջանի ԱԳՆ-ն հայտնել էր, որ կազմակերպությանն անդամակցելու պաշտոնական հայտ է ներկայացվել։

Թարգմանությունը՝ Էմմա Չոբանյանի