Հրազդանում բացվել է «Սասունցի Դավիթ» անիմացիոն ցուցահանդեսը

Հոկտեմբերի 21-ին  Հրազդանի  Հ. Պարոնյանի անվան դպրոցում մեկնարկել է  «Սասունցի Դավիթ»  քոչարյան պատկերապատման կոնցեպտուալ․ անմիացիոն ցուցահանդեսը․ տեղեկացնում են թանգարանի լրատվական ծառայությունից։

««Արդեն երկրորդ տարին է, որ կայանում է Երվանդ Քոչարի թանգարանի և այս դպրոցի հետ համագործակցային ծրագիր: Այս անգամ այն բոլորովին նոր է, թեպետ նվիրված է նույն թեմային՝  Քոչարի  «Սասունցի Դավիթ» էպոսի նկարազարդումների շարքին»,- նշում է  Ե․ Քոչարի թանգարանի տնօրեն Կարինե Քոչարը։

Էպիկական պատումը Քոչարը ներկայացնում է գրաֆիկական 7 էջով, վերարտադրելով Հայկական լեռնաշխարհում իբրև թե պահպանված հնագույն հարթաքանդակներ, որտեղ պատկերված են Սասնա դյուցազունների քաջագործությունները: Ինչպես նշում են արվեստաբանները, այս շարքը հանդիսանում է հայկական գրաֆիկայի բարձրագույն նվաճումներից, որը պատմություն է ոչ միայն մեր անցյալի մասին, այլև վաղվա պատգամ:

Կարևորելով    արվեստի  զորությունը և դերակատարումը ազգապահպանման գործում՝ և գիտակցելով, որ ազգապահպանումը կարող է իրականանալ միայն  ազգային  ինքնության  արժեքների միջսերնդական փոխանցման միջոցով, Երվանդ Քոչարի թանգարանը  և  Հրազդանի  Հ. Պարոնյանի անվան դպրոցի տնօրինությունը մեկ անգամ ևս անդրադառնում են այս թեմային:

Թե՛ դպոցում, թե՛ թանգարնում վստահ են՝ Քոչարյան ստեղծագործությունները կամա թե ակամա միտված են արթնացնելու մարդկանց մտքերն ու հոգիները, իսկ ահա դրանց մի մեծ հատված կոչված է վառ պահելու  մեր պատմական հիշողությունն ու  ազգային ինքնագիտակցության ոգին և նպաստում է մեր մշտական հոգևոր վեածննդին:

Կարինե Քոչարը նաև վստահ է, որ այս ցուցադրությունը թանգարան- դպրոց համագործակցության արդյունքում նաև յուրատեսակ,  մասշտաբային կրթական ծրագիր է՝ ուղղված միաժամանակ և՛ մեր երեխաների, և՛ իտասարդների, և՛ մարզի կամ համայնքի բնակիչների շրջանում սերմանելու հետաքրրություն և խորին հարգանք  սեփական մշակութային ժառանգության հանդեպ, հետաքրրություն թանգարանային գործունեության հադեպ:

«Այս անգամ ևս մեր  կազմակերպած  ցուցադրությունը  ոչ միայն ներկայացնելու է  քոչարյան նկարազարդումները, այլև նորարարական լուծումների, արտ օբյեկտների, լուսային, պրոյեկցիոն էֆեկտների, ձայնային և տեսողական  ինքնատիպ գաղափարների կիրառմամբ։ Փորձել ենք ստանալ էպոսյան առասպելական միջավայրը, և ներթափանցելով այցելուների ներաշխարհ՝ փոխանցել այն հիմնական ազդակները, որոնցից  ներշնչվելով էլ Քոչարը ստեղծել իր գրաֆիկական էջերը… »,-ընդգծում է ցուցահանդեսի համակարգող է Աշոտ Մարաբյանը։

Հավելենք, որ ցուցահանդեսը կազմակերպվել  է Երվանդ Քոչարի ծննդյան- 125 ամյակի շրջանակում։ Այն կգործի մինչև հոկտեմբերի 26-ը»,- ասված է հաղորդագրությունում։