Քաղաքականություն
22.10.2024 | 13:47
Բաքվում երեկ երեկոյան և գիշերը տեղացած հորդառատ անձրևները քաղաքում իսկական ջրհեղեղ են առաջացրել։ Ադրբեջանական լրատվամիջոցները հայտնում են, որ ամենաշատը տուժել են քաղաքի Սաբունչիի, Բինգադիի, Նարիմանովի և մի շարք այլ շրջաններն ու հարակից բնակավայրերը։
Տեղատարափ անձրևը հանգեցրել է նրան, որ ճանապարհներին և ստորգետնյա թունելներում ջրի մակարդակը տեղ-տեղ բարձրացել է մինչև 1,5-2 մետր։ Արդյունքում տասնյակ մեքենաներ արգելափակվել են ճանապարհներին։
Հաղորդվում է տուժածների մասին, սակայն պաշտոնապես այդ տեղեկությունը չի հաստատվել։
Համացանցում բազմաթիվ տեսանյութեր են տարածվում ջրհեղեղի պատճառած վնասներից։ Հեղեղվել են նաև ուսումնական հաստատություններ, մետրոյի կայարարաններ, բնակելի տներ։ Տարածվող տեսանյութերից մեկում Ford մակնիշի մարդատար ավտոմեքենան ջրի տակ է անցել։ Ենթադրվում է, որ երկու մարդ խեղդվել է։
Հաղորդվում է, որ այսօր էլ Բաքվի Սուրախանի շրջանում գտնվող թունելում մարդատար ավտոբուսն ընկղմվել է ջրի մեջ։ Ըստ տեղեկությունների՝ ավտոբուսում նաև ուղևորներ են եղել, նրանց հաջողվել է ավտոբուսից դուրս բերել պարանով։
Երկրի Արտակարգ իրավիճակների նախարարությունը հայտնել է, որ Բաքվի և Ապշերոնի շրջանի ջրածածկ տարածքներից անվտանգ վայրեր է տարհանվել 31 մարդ։
Այսօր նույնպես անձրևի, ինչպես նաև հեղեղից թունելների խցանվելու պատճառով Բաքվի մի շարք փողոցներում և պողոտաներում խցանումներ են, մի շարք փողոցներում տրանսպորտային միջոցների տեղաշարժի սահմանափակումներ են մտցվել։
Թարգմանությունը՝ Էմմա Չոբանյանի
