20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
Էրդողանը չորեքշաբթի կմեկնի ՌԴ՝ ԲՐԻԿՍ-ի գագաթնաժողովին մասնակցելու և Պուտինի հետ բանակցությունների
Քաղաքականություն
22.10.2024 | 11:10
Թուրքիայի նախագահ Ռեջեփ Թայիփ Էրդողանը չորեքշաբթի մեկնելու է Կազան՝ մասնակցելու ԲՐԻԿՍ-ի գագաթնաժողովին։ Այս մասին հայտարարել է Թուրքիայի իշխող «Արդարություն և զարգացում» կուսակցության փոխնախագահ և կուսակցության խոսնակ Օմեր Չելիքը ճեպազրույցում, գրում են տեղական լրատվամիջոցները։
«Մեր նախագահը չորեքշաբթի կայցելի Կազան՝ Ռուսաստան։ Կայանալու է ԲՐԻԿՍ-ի հանդիպումը։ Պահպանելով Թուրքիայի ավանդական դաշինքները և նրա ավանդական պատմական երթը, Թուրքիան ի սկզբանե ցանկություն է հայտնել մասնակցել աշխարհի բոլոր տեսակի դաշինքներին և հարթակներին՝ հարաբերությունները դիվերսիֆիկացնելու նպատակով։ Այս համատեքստում մեր նախագահի մասնակցությունն այս գագաթնաժողովին և նրա շփումները կունենան ուղղորդող արժեք գալիք ժամանակահատվածի համար»,- ասել է Չելիքը։
Կրեմլն էլ իր հերթին հայտնել է, որ ՌԴ նախագահ Վլադիմիր Պուտինի ու Թուրքիայի նախագահ Ռեջեփ Թայիփ Էրդողանը երկկողմ հանդիպում են անցկացնելու հոկտեմբերի 23-ին գագաթնաժողովի շրջանակներում։ Նշվում է, որ Ռուսաստանի և Թուրքիայի միջև բազմակողմ համագործակցությունը դինամիկ է զարգանում բոլոր հիմնական ոլորտներում և կրում է գործընկերային և փոխշահավետ բնույթ։ Հարցերից մեկն էլ, որը քննարկելու են երկու երկրների ղեկավարները, Թուրքիայի տարածքում գազային հանգույցի ստեղծումն է։
Հավելենք, որ այսօր Կազանում մեկնարկելու է ԲՐԻԿՍ-ի գագաթնաժողովը, որն անցկացվելու է մինչև հոկտեմբերի 24-ը։
Թարգմանությունը՝ Էմմա Չոբանյանի
