Քաղաքականություն
18.10.2024 | 22:16
Ռուսաստանը, ըստ անհրաժեշտության, պահպանում է կապերը Վրաստանի հետ, կա հնարավորություն՝ քննարկելու առևտրի և զբոսաշրջության ոլորտները, ասել է ՌԴ արտգործնախարար Սերգեյ Լավրովը, գրում է Գրուզիա օնլայնը։
«Մենք շփումներ ունենք Թբիլիսիի հետ։ Մենք Շվեյցարիայի դեսպանությանը կից շահերի գոտի ունենք։ Այնտեղ աշխատում են մեր դիվանագետները, որոնք, ըստ անհրաժեշտության, հնարավորություն ունեն քննարկելու ընթացիկ հարցերը, առաջին հերթին՝ առևտրի, տուրիզմի ոլորտում, համակարգելու անմիջական շփումները Վրաստանի համապատասխան իշխանությունների հետ»,- ասել է Լավրովը «3+3» խորհրդատվական տարածաշրջանային հարթակի երրորդ հանդիպումից հետո։
Հիշեցնենք, որ Վրաստանը հրաժարվում է մասնակցել «3+3» հարթակին։ ՌԴ ԱԳՆ ղեկավարի խոսքով՝ հանդիպման ընթացքում դրա մասնակիցները ևս մեկ անգամ ընդգծել են, որ Վրաստանի համար հարթակի դռները միշտ բաց են։
Թարգմանությունը՝ Տաթև Ֆռանգյանի
