Տարածաշրջանի պետությունները լավագույնս գիտեն տեղի խնդիրները և կարող են լուծել դրանք․ Թուրքիայի ԱԳ նախարար

Թուրքիայի ԱԳ նախարար Հաքան Ֆիդանը Ստամբուլում մեկնարկած Հարավային Կովկասի տարածաշրջանային համագործակցության «3+3» հարթակի հանդիպմանն իր բացման խոսքում հայտարարել է, որ հավաքվել են հարթակի երրորդ հանդիպմանը, որը խորհրդակցական ձևաչափ է Հարավային Կովկասում մշտական ​​խաղաղության ապահովման և  համագործակցության հնարավորությունների գնահատման համար։

«Այս մեխանիզմի ստեղծման գաղափարը, որը մենք համառոտ սահմանում ենք որպես 3+3 հարթակ, առաջացել է 2020 թվականի նոյեմբերի 9-ի եռակողմ հռչակագրի ստորագրմանը հաջորդած շաբաթների ընթացքում, որն ապահովեց հրադադարը Ղարաբաղյան 2-րդ պատերազմում։ Դրա հիմնական նպատակն է արձագանքել հարթակի անհրաժեշտությունը, որտեղ կքննարկվեն Հարավային Կովկասին սերտորեն առնչվող բոլոր հարցերը»,- ասել է Ֆիդանը։

Նա նշել է, որ թեև հարթակը կոչվում է «3+3», ցավոք, դահլիճում մեկ մասնակից ներկա չէ։

«Եվս մեկ անգամ ուզում եմ հայտնել, որ մեր մտերիմ հարևան և բարեկամ Վրաստանի տեղը մշտական ​​է, նա կարող է միանալ այս հարթակին՝ երբ ցանկանա»,- հայտարարել է Թուրքիայի ԱԳ նախարարը։

«Անհանգիստ գործընթացներն ու պատերազմները, որոնք մենք ապրում ենք մեր մոտակա աշխարհագրությունում, հումանիտար աղետը և Իսրայելի կողմից Մերձավոր Արևելքում ճնշումները ևս մեկ անգամ բացահայտում են տարածաշրջանային մակարդակում երկխոսության և համագործակցության կարևորությունը։Կարծում ենք, որ այս տարածաշրջանի պետությունները լավագույնս գիտեն տարածաշրջանային խնդիրները և կարող են լուծել դրանք»,- հավելել է նա։

Ֆիդանը նշել է՝ որպես այդ տեսլականի դրսևորում՝ ակնկալվում է հանդիպման ավարտին ընդունել համատեղ հռչակագիր։

Թարգմանությունը՝ Էմմա Չոբանյանի