07.10.2026 | 16:42
«Հրաշք այգի» ռեստորանային համալիրից 2 գորշ արջի տեղափոխվել են ապաստարան
Էրդողանն ու Միրզոյանը կհանդիպեն Ստամբուլում «3+3» հարթակի երկրների ԱԳ նախարարների հավաքի շրջանակում
Քաղաքականություն
17.10.2024 | 17:42
Ստամբուլում վաղը տեղի է ունենալու «3+3» հարթակի երկրների ԱԳ նախարարների հանդիպումը, որին մասնակցելու են Թուրքիայի ԱԳ նախարար Հաքան Ֆիդանը, ՀՀ ԱԳ նախարար Արարատ Միրզոյանը, ՌԴ ԱԳ նախարար Սերգեյ Լավրովը, ԱդրբեջանիԱԳ նախարար Ջեյհուն Բայրամովը և Իրանի ԱԳ նախարար Աբբաս Արաղչին։ Այս մասին գրում է թուրքական TRT Haber-ը։
Նշվում է, որ հանդիպմանը գնահատվելու են տարածաշրջանում պատերազմի ու հակամարտությունների փոխարեն կայունության հաստատման և բարգավաճման հաստատմանն ուղղված քայլերը, քննարկվելու են համագործակցության կոնկրետ ծրագրեր, այդ թվում՝ տարածաշրջանային կապի ամրապնդումը։ Մտքեր են փոխանակվելու տարածաշրջանային և միջազգային կարևոր զարգացումների շուրջ։
Թուրքիայի արտգործնախարարն անդրադառնալու է Հարավային Կովկասում խաղաղության և կայունության հաստատմանն ուղղված Անկարայի ջանքերին։ Սպասվում է, որ Ֆիդանը կհայտարարի, որ Անկարան աջակցում է Ադրբեջանի և Հայաստանի միջև ընթացող խաղաղության պայմանագրի բանակցություններին, և որ հարաբերությունների կարգավորման գործընթաց է սկսվել նաև Թուրքիայի և Հայաստանի միջև։
Բացի այդ, Ֆիդանն ընդգծելու է տնտեսական ոլորտի կարևորությունը՝ որպես վստահության ամրապնդման միջոցներ և հատկապես կարևորելով կապն ու տնտեսական ինտեգրումը:
Ըստ թուրքական աղբյուրի՝ հանդիպման շրջանակում Թուրքիայի նախագահ Ռեջեփ Թայիփ Էրդողանն ընդունելու է հրավիրյալ նախարարներին, իսկ Ֆիդանը երկկողմ հանդիպումներ է ունենալու իր գործընկերների հետ։
Հարավային Կովկասի տարածաշրջանային համագործակցության հարթակի երրորդ հանդիպման ավարտին նախատեսվում է համատեղ հռչակագրի ընդունում մասնակից երկրների կողմից։
Հիշեցնենք, որ այս ձևաչափով նախորդ հանդիպումը տեղի էր ունեցել Թեհրանում 2023 թվականին։
Թարգմանությունը՝ Էմմա Չոբանյանի
