ՔՊ-ի ազդեցությունը դատական համակարգի վրա․ արդյո՞ք կոռուպցիա կա. ՏԵՍԱՆՅՈՒԹ

Դատական համակարգում արդյո՞ք կոռուպցիա կա, ովքե՞ր են դառնում դատավորներ, և արդյո՞ք նրանք որակյալ որոշումներ են կայացնում։ Այս հարցը դեռ չի կորցրել իր արդիականությունը։ Բարեվարքություն, արդարամտություն, ապաքաղաքականացվածություն, պատասխանատվության զգացում ու մասնագիտական կարողություններ։ Ահա այսպիսի որակներ պետք է ունենան նորընտիր դատավորները։ Մինչդեռ Factor TV-ի ուսումնասիրությունները ցույց են տվել, որ դատավորներ են դառնում քաղաքական գործունեությամբ զբաղվածներ, կառավարող ՔՊ-ին նվիրատվություն կատարած անձանց հարազատներ։ Օրինակ՝ դատավոր Դավիթ Սարգսյանը ԱԺ «Քաղաքացիական պայմանագիր» խմբակցության պատգամավոր Տրդատ Սարգսյանի եղբայրն է։ Դատավոր Մասիս Մելքոնյանը «Հանրապետություն» կուսակցության նախկին անդամ է, և անցել է քրեական գործով։

Մինչև դատավոր դառնալը քրեական գործով անցնել է նաև Հակակոռուպցիոն դատարանի նախագահ Խաչիկ Ղազարյանը, որի անունը շոշափվել է մի քրեական գործով, նա ունեցել է վկայի կարգավիճակ, բայց ուշագրավ է, որ 6 մլն դրամ է վճարել՝ որպես պետությանը պատճառված վնասի հատուցում։ Կան նաև դատավորներ, որոնք ունեն քաղաքական կապեր։ Դատավոր Գուրգեն Մալխասյանի երկու որդիներից յուրաքանչյուրը Երևանի ավագանու ընտրությունների ժամանակ 2 մլն 200 000 դրամ է նվիրել «Քաղաքացիական պայմանագիր» կուսակցությանը։ Դատավորն ասել է՝ տեղյակ չի եղել դրանից։ Դատավոր Դավիթ Արղամանյանը 2018-ի հեղափոխության ժամանակ թմբուկ էր զարկում։

ՔՊ-ական նախկին դատավոր Արթուր Դավթյանը ԱԺ-ում «Քաղաքացիական պայմանագիր» խմբակցության ձայներով  ընտրվեց Վճռաբեկ հակակոռուպցիոն դատարանի քաղաքացիական պալատի դատական կազմի դատավոր, հետո դարձավ հակակոռուպցիոն պալատի նախագահ։ Ի վերջո չմոռանանք՝ ԲԴԽ-ն նախագահում է ՔՊ-ի կառավարության նախկին անդամ Կարեն Անդրեասյանը։ Առանձնահատուկ հետաքրքրություն է առաջացնում ԲԴԽ-ի կազմը՝  Կարեն Անդրեասյանի նախկին աշխատակիցը ՄԻՊ-ից, նրա սանիկը։ ԲԴԽ անդամ են եղել նաև Վճռաբեկ դատարանի դատավոր Նաիրա Հովսեփյանը, որը  վարչապետ Նիկոլ Փաշինյանի կնոջ՝ Աննա Հակոբյանի ընկերուհին է։ Սնանկության դատարանի դատավոր նախագահ է ընտրվել Արթուր Աթաբեկյանը, որը Նիկոլ Փաշինյանի մտերիմ Վահե Ղալումյանի ազգականն է։

Դատական համակարգը համալրվել է Դատական դեպարատամենտի, ինչպես նաև ԲԴԽ նախագահ Կարեն Անդրեասյանի՝ Արդարադատության նախարար եղած ժամանակ նախարարությունում աշխատած մի շարք աշխատակիցներով։
Քննարկմանը մասնակցում են՝ իրավապաշտպան Նինա Կարապետյանցը, Ժողովրդավարության զարգացման հիմնադրամի ծրագրերի ավագ ղեկավար Տաթևիկ Խաչատրյանը, ԿԿՀ-ի (Կոռուպցիայի կանխարգելման հանձնաժողովի) ներկայացուցիչ Մարիաննա Բաղինյանը, փաստաբաններ Միհրան Պողոսյանը և Վարազդատ Հարությունյանը։