26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
ԱՄՆ-ը նախազգուշացրել է Իսրայելին՝ կսահմանափակի ռազմական օգնությունը, եթե Գազայում հումանիտար իրավիճակը 30 օրում չբարելավվի
Քաղաքականություն
16.10.2024 | 13:29
ԱՄՆ նախագահ Ջո Բայդենի վարչակազմը նախազգուշացրել է Իսրայելին, որ եթե Գազայում հումանիտար իրավիճակը չբարելավվի առաջիկա 30 օրվա ընթացքում, Վաշինգտոնը կարող է սահմանափակել Իսրայելին տրամադրվող ռազմական օգնությունը, հաղորդում է NBC News-ը։
Կիրակի Իսրայելի պաշտպանության նախարար Յոավ Գալանտին և ռազմավարական հարցերի նախարար Ռոն Դերմերին ուղղված նամակում ԱՄՆ պետքարտուղար Էնթոնի Բլինքենը և պաշտպանության նախարար Լլոյդ Օսթինը հայտնել են, որ Միացյալ Նահանգները պետք է շարունակաբար գնահատի իր սեփական օրենսդրության համաձայն՝ արդյո՞ք Իսրայելն «ուղղակի կամ անուղղակի» խոչընդոտում է ամերիկյան մարդասիրական օգնության տեղափոխմանը Գազա: Եթե այդպես լինի, ըստ պաշտոնյաների, ԱՄՆ-ը կարող է դադարեցնել լրացուցիչ օտարերկրյա ռազմական ֆինանսավորումը։
ԱՄՆ Պետքարտուղարության խոսնակ Մեթյու Միլլերը ճեպազրույցում հաստատել է նամակի առկայությունը, սակայն չի մեկնաբանել, թե ինչ հետևանքներ կլինեն Իսրայելի համար, եթե Գազա մարդասիրական օգնության հոսքը չբարելավվի։
Բայդենի վարչակազմը նմանատիպ նախազգուշացում իսրայելցի պաշտոնյաներին ուղարկել է ապրիլին՝ պահանջվող զեկույցից առաջ, և ԱՄՆ-ը, ի վերջո, որոշել էր, որ հետագայում հումանիտար իրավիճակը բարելավելուն ուղղված Իսրայելի գործողությունները համապատասխանում են իրավական պահանջներին:
«Մենք նրանց հետ մի շարք խոսակցություններ ենք ունեցել հումանիտար օգնության շատ լուրջ կրճատումների մասին։ Ի վերջո, մենք չտեսանք, որ մեր մտահոգությունները բավարար չափով լուծված են, ուստի երկու պաշտոնյաները նամակ են ուղարկել»,- ասել է Միլլերը։
Նախօրեին Գազայի առողջապահության նախարարության տվյալներով՝ նախորդ 24 ժամվա ընթացքում զոհվել է 55 մարդ, վիրավորվել՝ 329-ը։ Նախարարությունը նշում է, որ Գազայում զոհերի ընդհանուր թիվը 2023 թվականի հոկտեմբերի 7-ից ի վեր ավելի քան 42,000 է։
Թարգմանությունը՝ Էմմա Չոբանյանի
