06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Վրացական բանտում արդեն 24 օր հացադուլ իրականացնող ադրբեջանցի ընդդիմադիր լրագրողի վիճակը կտրուկ վատթարացել է
Քաղաքականություն
15.10.2024 | 23:13
Վրաստանի բանտում արդեն 24 օր հացադուլի մեջ գտնվող ադրբեջանցի ընդդիմադիր լրագրող Աֆղան Սադիգովի առողջական վիճակը կտրուկ վատացել է, գրում են ադրբեջանական լրատվամիջոցները։ Նրա կինը՝ Սևինջ Սադիգովան լրատվամիջոցներին հայտնել է, որ ամուսինը նախօրեին ուշագնաց է եղել բանտի հիվանդանոցում։
«Աֆղանը զանգահարել է հայտնել, որ առավոտյան ընկել է, երբ փորձել է ջուր խմել։ Երբ նա արթնացել է, տեսել է բժիշկներին իր գլխավերևում։ Նրանից արյան անալիզ են վերցրել։ Աֆղանն ասաց, որ չի հիշում, թե որքան ժամանակ է եղել անգիտակից վիճակում։Նա հացադուլի մեջ է արդեն 24 օր։ Առողջությունը թույլ չի տալիս հացադուլ անել։ Այս գործողությունը կարող է սպանել նրան»,- նշել է կինը՝ դատապարտելով վրացական իշխանություններին՝ Աֆղանին ձերբակալելու և Բաքվին արտահանձնելու Ադրբեջանի կառավարության հրամանը կատարելու համար։
Սադիգովան ասել է, որ չնայած առողջական վիճակի վատթարացմանը՝ լրագրողը հայտնել է, որ հացադուլը շարունակելու է մինչև վերջ։
«Ես աղաչեցի նրան դադարեցնել։ Բայց նա չի փոխում իր միտքը։ Նա ասաց, որ այն երկրներում, որտեղ օրենքները չեն գործում, ինքն իրեն պաշտպանելու միջոց չի տեսնում, բացի հացադուլից»,- պատմել է կինը։
Հիշեցնենք, որ Վրաստանի միգրացիոն ծառայությունը հրաժարվել էր ապաստան տրամադրել Ադրբեջանի քաղաքացի Աֆղան Սադիգովին։ Վրացական կողմն իր մերժումը բացատրել է նրա դեմ հարուցված գործում «քաղաքական դրդապատճառների բացակայությամբ»։ Այժմ Սադիգովին սպառնում է արտաքսում Ադրբեջան։ Համապատասխան հարցումն Ադրբեջանի գլխավոր դատախազությունից ստացվել է հուլիսին։ Դրանում ասվում է, որ մայիսի 10-ին Սադիգովի դեմ քրեական գործ է հարուցվել շորթման մեղադրանքով։ Դատարանի որոշմամբ՝ նրա նկատմամբ հայտարարվել է հետախուզում։
Թբիլիսիի դատարանն օգոստոսի 4-ին որոշում է կայացրել AzelTV-ի կայքի հմանդիր Աֆղան Սադիգովին 2 ամսով կալանավորելու մասին։ Դեռևս օգոստոսի 3-ին նրա կինը ֆեյսբուքյան ուղիղ եթերում հայտնել էր Սադիգովի ձերբակալության մասին։ Կինը կարծում է, որ վրացական ոստիկանությունն իր ամուսնուն ձերբակալել է Ադրբեջանի նախագահ Իլհամ Ալիևի հրահանգով։ Հուլիսի 18-ին էլ Սադիգովին Թբիլիսիի օդանավակայանում թույլ չէին տվել Անկարա թռչել։ Նրան ձերբակալել էին սահմանային անցակետում։ Սադիգովի խոսքով՝ իրեն ասել են, որ բացի Ադրբեջանից՝ այլ երկիր գնալ չի կարող։
Լրագրողը Վրաստանում է ապրում անցյալ տարվա դեկտեմբերի 24-ից։ Նա բուժման նպատակով գնացել է Վրաստան, սակայն սպառնալիքների պատճառով չի վերադարձել Ադրբեջան։ Մինչ այս Սադիգովը կալանավորվել է 2020 թվականի մայիսին՝ շորթման մեղադրանքով։ 2020-ի նոյեմբերի 3-ին դատարանը նրան դատապարտել է 7 տարվա ազատազրկման։ Վերաքննիչ դատարանը պատիժը կրճատել է մինչև 6 տարի, իսկ Գերագույն դատարանը՝ 4 տարի։ 2022 թվականի մայիսին նրան ներում է շնորհվել։
Էմմա Չոբանյան
