Ադրբեջանական ընդդիմադրիր կուսակցությունը Նարիշկինին մեղադրել է Ադրբեջանի ներքին գործերին միջամտելու մեջ

Ադրբեջանի ընդդիմադիր «Մուսավաթ» կուսակցությունը վարչության հերթական նիստում քննարկել է երկրում տիրող հասարակական-քաղաքական իրավիճակը։ Նշվել է, որ Ֆրանսիայում քաղաքական էմիգրանտ Վիդադի Իսկանդերլիի սպանությունը լուրջ անհանգստություն է առաջացրել հասարակության մեջ, և Ֆրանսիայի համապատասխան գերատեսչությունները կոչ է արվել օբյեկտիվորեն հետաքննել սպանությունը և գտնել հանցագործներին, գրում են տեղական լրատվամիջոցները

«Մուսավաթ»-ի վարչության անդամները դատապարտել են նախկին պատգամավոր Նազիմ Բեյդամիրլիի 8 տարվա ազատազրկման դատավճիռը։ Քննադատվել է նաև նախնական կալանքի տակ գտնվող երիտասարդ ակտիվիստ և լրագրող Ուլվի Հասանլիի նկատմամբ ճնշումները, Հասանլիի և Abzas Media-ի, Toplum TV-ի աշխատակիցների խափանման միջոցի երկարաձգումը։

Ընդդիմադիրներն անդրադարձել են նաև ԱՄՆ մի խումբ կոնգրեսականների՝ Էնթոնի Բլինքենին ուղղված դիմումին և դրան Ադրբեջանի խորհրդարանի արձագանքին։ Նշվել է, որ ուղերձն արդարացիորեն վերաբերում է Ադրբեջանում քաղբանտարկյալներին, սակայն կուսակցությունն «անհիմն է» անվանել հարաբերությունների վերաբերյալ հայտարարությունները։

Ինչ վերաբերում է Ռուսաստանի արտաքին հետախուզական ծառայության տնօրեն Սերգեյ Նարիշկինի՝ Բաքվում «ոչ համակարգային ընդդիմության» դեմ համատեղ պայքարի մասին հայտարարություններին, դա դիտարկվել է որպես միջամտություն Ադրբեջանի ներքին գործերին։

«Մուսավաթ»-ն Ադրբեջանի իշխանություններից պահանջել է ազատ արձակել քաղբանտարկյալներին և կատարել պարտավորությունները՝ կապված մարդու իրավունքների ապահովման հետ, ինչպես նաև արագացնել տարածաշրջանում կարգավորման գործընթացը և Հայաստանի հետ խաղաղության համաձայնագիր ստորագրել՝ Ադրբեջանի հասցեին մեղադրանքներից խուսափելու համար։

Հիշեցնենք՝ օրերս Սերգեյ Նարիշկինն այցով Բաքվում էր։ Ռուսական կողմը հաղորդագրության մեջ ասվում էր, որ հանդիպումներում «նշվել է արտասահմանյան հետախուզական ծառայությունների կողմից ոչ համակարգված ընդդիմության և միջազգային ահաբեկչական կազմակերպությունների օգտագործման դեմ համատեղ ջանքերի ավելացման անհրաժեշտությունը՝ Ռուսաստանում և Ադրբեջանում սոցիալ-քաղաքական կայունությունը պահպանելու նպատակով»։

Նարիշկինի հայտարարությունները բուռն քննարկումներ են առաջացրել Ադրբեջանի ընդդիմադիր շրջանակներում։

Թարգմանությունը՝ Էմմա Չոբանյանի