Սերգեյ Նարիշկինը Բաքվում Ալիևի հետ քննարկել է «արևմտյան ծառայությունների կողմից երկրներում ապակայունացման փորձերը»

ՌԴ Արտաքին հետախուզության ծառայության տնօրեն Սերգեյ Նարիշկինը հոկտեմբերի 2-3-ը Բաքու կատարած պաշտոնական այցի ընթացքում հանդիպել է Ադրբեջանի նախագահ Իլհամ Ալիևին, բանակցություններ վարել այդ երկրի Պետական ​​անվտանգության ծառայության հետ, գրում է ՏԱՍՍ-ը։

Ծառայության հաղորդագրությունում նշվում է, որ Ալիևի հետ հանդիպմանը շոշափվել են «միջազգային իրավիճակի արդիական հարցերը, ՌԴ Արտաքին հետախուզական ծառայության ներկայիս փոխգործակցությունն Ադրբեջանի հատուկ ծառայությունների հետ հետախուզական գործունեության տարբեր ոլորտներում, քննարկվել են առաջիկայում երկկողմ համագործակցության առաջնահերթությունները»։

«ՌԴ արտաքին հետախուզական ծառայաության պատվիրակության և Ադրբեջանի արտաքին հետախուզության և պետական ​​անվտանգության ծառայության ղեկավարության միջև բանակցություններում նշվել է, որ ռուս-ադրբեջանական համագործակցությունը հետախուզական ծառայությունների միջոցով դինամիկ է զարգանում, կրում է կառուցողական, փոխշահավետ և վստահելի բնույթ, որն ուղղված է Ռուսաստանի Դաշնության և Ադրբեջանի ազգային շահերի պաշտպանությանն առնչվող հարցերի լուծմանը կոնկրետ արդյունքների հասնելուն»,- ասվում է հաղորդագրության մեջ։

Բացի այդ, կողմերը նշել են, որ փոխգործակցության մեջ առանձնահատուկ տեղ է հատկացվում «արևմտյան հետախուզական ծառայությունների թշնամական նկրտումները բացահայտելու ջանքերին, որոնք ուղղված են ներքաղաքական կայունության խարխլմանը երկու պետություններում»։

Բաքվում լրատվամիջոցների հետ զրույցում Նարիշկինը հայտարարել է, որ Ադրբեջանի նախագահ Իլհամ Ալիևի հետ քննարկել է միջազգային օրակարգի հետ կապված հարցեր։

«Հանդիպմանը քննարկել ենք մեր երկրների միջև համագործակցության լայն շրջանակը, ինչպես նաև մի շարք հարցեր, որոնք վերաբերում են միջազգային օրակարգին»,- ասել է նա՝ նշելով, թե մի շարք արևմտյան երկրներ, այդ թվում՝ ԵԱՀԿ-ն, փորձել են «վարկաբեկել Ադրբեջանում խորհրդարանական ընտրությունները»՝ դրանց արդյունքները կասկածի տակ դնելով։

«Ես գրեթե համոզված եմ, որ նույնը տեղի կունենա Վրաստանում կայանալիք խորհրդարանական ընտրությունների հետ կապված»,- հայտարարել է Նարիշկինը։ Նա նաև նշել է, թե իբրև  Ռուսաստանի և Ադրբեջանի հատուկ ծառայությունները կանխել են  ռուս դիվանագետի նկատմամբ ԱՄՆ սադրանքը։

Թարգմանությունը՝ Էմմա Չոբանյանի