Քաղաքականություն
08.10.2024 | 20:00Միջազգային հարաբերությունների դոկտոր, Անվտանգային վերլուծությունների ինստիտուտի ավագ փորձագետ Էդուարդ Աբրահամյանը Factor TV-ի հետ զրույցում խոսել է իր և ադրբեջանագետ Տաթևիկ Հայրապետյանի իրականացրած հետազոտության մասին, ըստ որի՝ Ռուսաստանի և Ադրբեջանի ղեկավարների միջև առկա են ոչ միայն խոսույթային նմանություններ, այլև՝ ավտորիտար և կոշտ գործելակերպի ընդհանրություն։ Հեղինակները նշում են, որ հարևան երկրների հանդեպ նվաճողական քաղաքականությունը արդարացնելու համար Ալիևն օգտագործում է «Արևմտյան Ադրբեջան» տերմինը, իսկ Պուտինը ընդհանրապես՝ Ուկրաինան է կեղծ պետություն որակում, Ուկրաինայի տարածքը կոչում է «Նովոռոսսիա»։
Մյուս կարևոր առանձնահատկությունը, որ նշում են նրանք՝ պետության գոյությունը բռնապետի անձի գոյությամբ պայմանավորելն է, մասնավորապես, մեջբերվում է Վոլոդինի խոսքը՝ քանի կա Պուտինը, կլինի նաև Ռուսաստանը։ Նույն կերպ Ադրբեջանում պետությունը նույնացվում է Ալիևի և նրա կնոջ բռնապետական ռեժիմի՝ դինաստիայի գոյության վրա, այսինքն՝ իշխանության ժառանգական փոխանցում կա։ Տեսնում ենք՝ Ալիևի թիկունքից արդեն որդին է կանգնած։ Մասնագետները նշում են, որ Պուտինի և Ալիևի մտածելակերպի արմատները ԽՍՀՄ-ի ԿԳԲ-ից են գալիս, որը խթանում է բռնապետական կառավարումը։
«Այս հետազոտության ուղերձն այն է, որ Ադրբեջանը վերածվել է փոքրիկ Ռուսաստանի՝ նվաճողական է և ագրեսիվ, և ՀՀ-ն չի՛ կարող հնազանդվել փոքրիկ ՌԴ-ի պահանջներին։ ՀՀ-ն Ադրբեջանի և ՌԴ-ի պարտադրած ուժին չպիտի հնազանդվի, եթե ձգտում է համեմատվել դեմոկրատական երկրների հետ։ Պուտինի և Ալիևի միջև քիմիա ձևավորվեց՝ երկուսն էլ ԿԳԲ-ական մտածելակերպ ունեն, գունավոր հեղափոխությունների դեմ են պայքարել միասին, ընդհանուր բախտի զգացողություն ունեն, իրենք իրենց նույն «մաստի» մարդ են պատկերացնում, և նույնական խոսույթ ունեն՝ «Արևմուտք», «Սորոս» և այլն։ Նկատի ունեմ՝ մեղադրանքներ և պայքար կա Արևմուտքի դեմ։ Միջանցքը ՌԴ-ի և Ադրբեջանի գործիքն է ՀՀ-ն հնազանդեցնելու, կցելու այդ պետությունը իրենց․ միջանցքի պահանջով նաև պատերազմի իրավունք են ստեղծում։ Ադրբեջանի և ՀՀ-ի միջև խաղաղություն անհնար է․ հակահայկականությունն է այդ պետության գոյության իմաստը»։
Հարցազրույցն ամբողջությամբ՝ տեսանյութում։
Ռոբերտ Անանյան
