Իրավապաշտպան կազմակերպությունները դատապարտել են Թուրքիայի ծայրահեղ աջ կուսակցության առաջնորդի կողմից լրագրողներին ուղղված սպառնալիքները

Խոսքի ազատության 13 ազգային և միջազգային կազմակերպություններ ու մամուլի միություններ դատապարտել են Թուրքիայի ծայրահեղ աջ «Ազգայնական շարժում» կուսակցության (MHP) առաջնորդ Դևլեթ Բահչելիի կողմից լրագրողներին ուղղված վերջին սպառնալիքները։ Այս մասին հաղորդում է ԶԼՄ-ների և իրավունքի ուսումնասիրությունների ասոցիացիան, գրում է Stockholm Center for Freedom-ը։

Հոկտեմբերի 1-ի ելույթում Բահչելին թիրախավորել էր Halk TV-ին և լրագրողներ Շյուլե Այդընին, Բարիշ Փեհլիվանին, Մուրադ Աղըրելին և Թիմուր Սոյքանին՝ Սինան Աթեշի (2019-2020 թվականներին «Գորշ գայլերի» ղեկավարը) սպանության մասին նրանց հաղորդման համար՝ ասելով. «Halk TV, նայիր քո քայլին։ Չես կարող MHP-ին հարցականի տակ դնել չորս ծաղրածու լրագրողների հետ»:

Կազմակերպությունների համատեղ հայտարարության մեջ Բահչելիի խոսքերը որակվել են որպես «բացահայտ սպառնալիք» մամուլի ազատությանը։

«Անընդունելի է, որ լրագրողներին սպառնան իրենց մասնագիտական ​​գործունեության համար։ Մենք հակազդելու ենք այդ սպառնալիքներին և ուշադիր հետևելու ենք գործընթացին»,- ասվում է հայտարարության մեջ։

Աթեշը մահացու վիրավորվել է Անկարայում 2022 թվականի դեկտեմբերի 30-ին։ Սպանությունը լայնածավալ վեճերի տեղիք է տվել՝ կապված Թուրքիայի նախագահ Ռեջեփ Թայիփ Էրդողանի դաշնակից MHP-ի կիսառազմական թևի՝ ուլտրաազգայնական «Գորշ գայլերի» նախկին ղեկավարի դերի պատճառով։

Չորեքշաբթի թուրքական դատարանը 5 մեղադրյալի, այդ թվում՝ մարդասպանին, ցմահ ազատազրկման է դատապարտել։ Այս գործը նշանավորվել է  MHP-ի գործիչների կողմից քաղաքական միջամտության մեղադրանքներով, որոնք մեղադրվում էին սպանությունը կազմակերպելու մեջ:

Հայտարարության մեջ նաև ընդգծվել են Աթեշի սպանության դատավարության ընթացքում տեղի ունեցած վերջին միջադեպերը, երբ մի կասկածյալ սպառնալից արտահայտություններ է օգտագործել լրագրողների հասցեին, իսկ մյուսը ձեռքի շարժում է արել, ասես կրակում է:

Խմբերը շեշտում են այս սպառնալիքներին լրջորեն վերաբերվելու կարևորությունը՝ պաշտպանելու մամուլի ազատությունը և պաշտպանելու ժողովրդավարական արժեքները:

Հայտարարությունը ստորագրողների թվում են՝ Մամուլի խորհուրդը, Ժամանակակից լրագրողների ասոցիացիան (ÇGD), Իզմիրի լրագրողների ասոցիացիան, Տնտեսական լրագրողների ասոցիացիան, ՀՈԴՎԱԾ 19-ը, Դիվանագիտության լրագրողների ասոցիացիան (DMD), Թուրքիայի լրագրողների միությունը (TGS), Մամուլի միջազգային ինստիտուտը (IPI) և Dicle Fırat լրագրողների ասոցիացիան և այլն։

Թարգմանությունը՝ Էմմա Չոբանյանի