09.09.2026 | 15:15
ՀՀ-Ադրբեջան սահմանազատումը՝ հյուսիսից հարավ //ՀՀ քաղաքացիության տուրքը կբարձրանա․ ԼՈՒՐԵՐ
ՆԳՆ-ն և Կիրանցի վարչական ղեկավարը հերքում են երեխաների առևանգման մասին տեղեկությունը
Հասարակություն
04.10.2024 | 13:50
ՆԳՆ-ն հերքում է մամուլում տարածված տեղեկությունը, թե Տավուշի մարզի Կիրանց համայնքում մի տղամարդ փորձել էլ իր հետ տանել երեխաներին, որոնք մանկապարտեզ են հաճախում Ծաղկավան համայնքում։ Ոստիկանության բաժնից Factor.am-ին տեղեկացրին, որ նման բովանդակությամբ ո՛չ ահազանգ է եղել, ո՛չ էլ ձերբակալված կա։
«Կիրանցի երեխաների առևանգման մասին տեղեկությունը կեղծ է»,- նշեցին իրավապահ մարմնից։
Կիրանցի վարչական ղեկավար Կամո Շահինյանը Factor.am-ի հետ զրույցում ևս հերքեց տեղեկությունը։
«Նման բան չկա, ժողովուրդ ջան, ամո՛թ է, էս մարդկանց ահուսարսափի մեջ մի պահեք»,- հավելեց Կիրանցի ղեկավարը։
Հիշեցնենք՝ օրեր առաջ Մալաթիա-Սեբաստիա վարչական շրջանում միջին տարիքի մի տղամարդը մոտեցել էր երեխաներին, քաշքշելով փորձել առևանգել։
ՆԳՆ-ից հաստատել էին, որ ոստիկանության Մալաթիայի բաժնի քրեական հետախուզության բաժանմունքում տեղեկություն էր ստացվել, որ սեպտեմբերի 25-ին Մազմանյան փողոցի բնակիչ 57-ամյա մի տղամարդ «Մերսեդես» մակնիշի ավտոմեքենայով Շրջանային փողոցում փորձել է առևանգել երկու անչափահասի։ Նախաձեռնված քրեական վարույթի շրջանակներում տղամարդը ձերբակալվել է։
Այս դեպքից հետո էլ երեկ մամուլում տեղեկություն տարածվեց Կիրանցում նմանատիպ դեպքի մասին, որը, փաստորեն, իրավապահները հերքում են։
Մանյա Պողոսյան
