Մեծ Բրիտանիան Չագոս կղզիները կփոխանցի Մավրիկիոսին՝ տարիներ շարունակ ձգձգվող վեճերից հետո

Մեծ Բրիտանիան հայտարարել է, որ հրաժարվում է ինքնիշխանությունից Հնդկական օվկիանոսում գտնվող Չագոս կղզիների հեռավոր, բայց ռազմավարական նշանակություն ունեցող կղզիների խմբի նկատմամբ և դրանք հանձնում է Մավրիկիոսին: BBC-ի ռուսական ծառայության փոխանցմամբ՝ այս մասին հայտարարել են երկու երկրների վարչապետները։

Լոնդոնի որոշումը վերջ է դրել արշիպելագի շուրջ Բրիտանիայի և Մավրիկիոսի միջև տասնամյակների լարված բանակցություններին:

Չագոս կղզիները ներառում են արևադարձային Դիեգո Գարսիա Ատոլը, որն օգտագործվում է Միացյալ Նահանգների կողմից որպես ռազմածովային ուժերի նավերի և հեռահար ռմբակոծիչների ռազմակայան: Մասնավորապես, այս բազան օգտագործվել է ամերիկյան ինքնաթիռների կողմից Աֆղանստանի և Իրաքի վրա հարձակումների ժամանակ։

Նոր համաձայնագրի պայմանների համաձայն՝ Բրիտանիան Մավրիկիոսից Դիեգո Գարսիան վարձակալելու է առնվազն 99 տարով՝ թույլ տալով ԱՄՆ-ին այնտեղ պահել իր ռազմաբազան։ Ըստ BBC-ի՝ ռազմաբազայի պահպանումը տարածաշրջանում արևմտյան երկրների, Հնդկաստանի և Չինաստանի միջև աճող աշխարհաքաղաքական մրցակցության առանցքային գործոն է:

Մեծ Բրիտանիայի և Մավրիկիոսի ղեկավարներն ասել են, որ իրենք հավատարիմ են «ապահովելու Դիեգո Գարսիայի վրա գոյություն ունեցող բազայի երկարաժամկետ, անվտանգ և արդյունավետ շահագործումը, որը կենսական դեր է խաղում տարածաշրջանային և գլոբալ անվտանգության մեջ»:

Չագոս արշիպելագը բաժանվել է Մավրիկիոսից 1965 թվականին, երբ այս երկիրը դեռ բրիտանական գաղութ էր։ Բրիտանիան այն գնել է 3 միլիոն ֆունտ սթերլինգով և հայտարարել իր անդրծովյան տարածք Հնդկական օվկիանոսում։

Մավրիկիոսը մեղադրում է Բրիտանիային արշիպելագի ապօրինի գաղութային օկուպացիայի մեջ՝ պնդելով, որ 1968 թվականին իրեն անօրինական կերպով ստիպել են հրաժարվել Չագոս կղզիների նկատմամբ իրավունքներից՝ անկախության դիմաց։

Թարգմանությունը՝ Տաթև Ֆռանգյանի