Մեզ համար կարևոր է, որ ստորագրություններն արագ հավաքվեն. Արտակ Զեյնալյան․ ՏԵՍԱՆՅՈՒԹ

Մենք խնդիր ունենք տեղեկատվության տարածման հետ կապված։ Հանրային հեռուստաընկերությունը հրաժարվել է ընդունել մեր գովազդը՝ պատճառաբանելով, որ ԿԸՀ-ն չի հաստատել քաղաքական գովազդի գնացուցակը, նաև հղում անելով, որ սա ընտրական իրավունք է»,- Եվրաքվեի ստորագրահավաքի առաջին 15 օրերի արդյունքների ամփոփմանը նվիրված մամուլի ասուլիսի ժամանակ ասաց ԿԸՀ-ում լիազոր ներկայացուցիչ Արտակ Զեյնալյանը։

Ըստ նրա՝ դա ընտրական իրավունքի իրացում չէ, ընտրական իրավահարաբերություններ չեն։

«Սրանք մարդու պետական և տեղական ինքնակառավարմանը մասնակցելու իրավունքի դրսևորումն են, և ԿԸՀ-ի կողմից ընտրական ժամանակաշրջանում գնացուցակի հաստատման նպատակը սանձելն է, զսպելն է հեռուստաընկերություններին, որպեսզի նրանք պահանջարկի մեծացման բերումով անսահման հնարավորություններ չունենան գին սահմանելու»,- ասաց Արտակ Զեյնալյանը՝ միևնույն ժամանակ ընդգծելով, որ իրենց համար կարևոր է, որ ստորագրություններն արագ հավաքվեն։

Դիտարկմանը, թե կարելի՞ է իշխանության կողմից ճնշում դիտարկել այն փաստը, որ Հանրային հեռուստաընկերությունը հրաժարվել է գովազդը ցուցադրել, Եվրաքվեի ստորագրահավաքի շտաբի մամուլի հետ կապերի պատասխանատու Հովսեփ Խուրշուդյանը պատասխանեց, թե չի կարծում, քանի որ Հանրային հեռուստաընկերությունը լուսաբանում է ստորագրահավաքի գործընթացը։

Բացի այս, Արտակ Զեյնալյանն ասաց, որ ԿԸՀ-ն այժմ աշխատում է էլեկտրոնային հարթակի վրա, ինչի արդյունքում մարդիկ կկարողանան իրենց հեռախոսներով ևս ստորագրել, անցած շաբաթ հայտնել են, որ 7-10 օրվա ընթացքում հարթակը պատրաստ կլինի։

Հիշեցնենք, որ «Ժողովրդավարական ուժերի հարթակ»-ի նախաձեռնությամբ սեպտեմբերի 16-ից մեկնարկելու է ԵՄ հանրաքվեի հարցով ստորագրահավաքը։ 60 օրվա ընթացքում` սեպտեմբերի 16-ից մինչև նոյեմբերի 14-ը, նախաձեռնող խումբը պետք է հավաքի 50 հազար ստորագրություն, որպեսզի ԵՄ-ին անդամակցության հանրաքվեի հարցը մտնի ԱԺ օրակարգ։ Այս օրերի ընթացքում քաղաքացիները կարող են այցելել մոտակա թաղապետարան կամ համայնքապետարան և միանալ ստորագրահավաքին։

Մանրամասները՝ տեսանյութում։