30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Կանադայի պատժամիջոցների պատճառով Ադրբեջանը Bayraktar TB2-ի օպտիկական համակարգերը փոխարինում է թուրքական արտադրանքով
Քաղաքականություն
01.10.2024 | 17:22
Թուրքիայի կողմից արտադրված և Ադրբեջանի ռազմաօդային ուժերի զինանոցում գտնվող Bayraktar TB2 մարտական անօդաչու թռչող սարքերի օպտիկական համակարգերը փոխարինվելու են։ Բաքվում անցկացված ADEX 2024 պաշտպանական արդյունաբերության ցուցահանդեսի շրջանակում թուրքական ASELSAN-ի հետ կնքված պայմանագրի համաձայն՝ անօդաչու սարքերի վրա կտեղադրվեն ASELFLIR-500 էլեկտրաօպտիկական համակարգեր, գրում են ադրբեջանական լրատվամիջոցները։
Հավելենք, որ թուրքական Baykar ընկերությունը, որն արտադրում է այս ԱԹՍ-ները, դրանք համալրել էր Կանադայում արտադրված WESCAM MX-15D օպտիկական համակարգերով։ Այս համակարգերն էին տեղադրված նաև Ադրբեջանի կողմից գնված Bayraktar TB2-ի վրա։
Արցախյան 44-օրյա պատերազմից հետո Կանադան չեղարկել էր Թուրքիային այս համակարգերի արտահանման թույլտվությունը։ Սակայն այս տարեսկզբին Օտտավան հայտարարեց, որ այլևս չի արգելի որոշակի զենքի արտահանումը Թուրքիա։
Անկարան, սակայն, որոշել է կանադական համակարգերը փոխարինել տեղական արտադրության օպտիկական համակարգերով։ ASELSAN-ն այդ նպատակով մշակել է ASELFLIR-500 էլեկտրաօպտիկական համակարգերը, որոնք այժմ տեղադրված են ինչպես Bayraktar TB2, այնպես էլ Bayraktar Akıncı անօդաչու թռչող սարքերի վրա։
Մեկնաբանելով ASELSAN-ի և Ադրբեջանի ռազմաօդային ուժերի ստորագրած պայմանագրի կարևորությունը՝ թուրքական աղբյուրները նշում են, որ ASELFLIR-500-ն ընկերության կողմից նախկինում մշակված CATS էլեկտրաօպտիկական համակարգի արդիականացված տարբերակն է։ Նոր համակարգն ունի 4096×2880 ցերեկային տեսախցիկ, 1280×720 գիշերային տեսախցիկ և լրացուցիչ SWIR տեսախցիկներ: Օպտիկական համակարգն ի վիճակի է լազերային ուղղորդել թիրախները մինչև 35 կիլոմետր հեռավորության վրա։
Պայմանագրի համաձայն՝ ASELSAN-ն Ադրբեջանի ռազմաօդային ուժերին ապահովելու է նաև TOLUN զինամթերքով, որը նախատեսված է ինչպես կոշտ բետոնե առարկաները, այնպես էլ փափուկ ցամաքային թիրախները ոչնչացնելու համար: Տարբեր օդային հարթակներից ցամաքային թիրախներին նետված զինամթերքի քաշը կազմում է 139 կիլոգրամ։ Կախված անկման բարձրությունից՝ դրա հեռահարությունը կարող է հասնել 100 կիլոմետրի։
Թարգմանությունը՝ Էմմա Չոբանյանի
