22.01.2026 | 23:29
ՀՀ տարածքում կան փակ ավտոճանապարհներ, Լարսը բաց է
Հայ ժողովուրդը պետք է իր ձայնը բարձրացնի Սահմանադրության փոփոխության հանրաքվե անցկացնելու պահանջով․ Հաջիև
Քաղաքականություն
27.09.2024 | 22:21
«Տարածաշրջանում իրական խաղաղություն է, որը ձեռք է բերվել ոչ թե Հայաստանի բարի կամքով, այլ Ադրբեջանի ռազմական և հարկադրական միջոցներով»։ Այս մասին իտալական «La Repubblica»-ին տված հարցազրույցում ասել է Ադրբեջանի նախագահ Իլհամ Ալիևի օգնական Հիքմեթ Հաջիևը։ Նա փորձել է արդարացնել Արցախի դեմ Բաքվի ռազմական ագրեսիան ու հայ բնակչության էթնիկ զտումը։
«Ելնելով այն հանգամանքից, որ 30 տարում հակամարտության կարգավորման մեջ էական արդյունք չեղավ՝ 2020 և 2023 թվականներին մենք ստիպված եղանք երկու ռազմական գործողություններ իրականացնել, որոնք «ազատագրեցին Հայաստանի կողմից օկուպացված Ղարաբաղյան հողերը և դրանով իսկ վերականգնեցին մեր տարածքային ամբողջականությունը»,-ասել է Հաջիևը։
«Մենք ավելի քան երբևէ մոտ ենք խաղաղությանը, բայց առջևում դեռ կան խոչընդոտներ։ Առաջինը Հայաստանի Սահմանադրությունն է, որը կասկածի տակ է դնում Ադրբեջանի տարածքային ամբողջականությունը։ Դրա նախաբանը վերաբերում է անկախության հռչակմանը, որտեղ հայերենով գրված է «Միացում» բառը, որը նշանակում է Ղարաբաղի ադրբեջանական տարածքների միավորում Հայաստանին։ Մենք ցանկանում ենք խաղաղության համաձայնություն ձեռք բերել ոչ միայն Հայաստանի կառավարության, այլ նաև հայ ժողովրդի հետ, որը պետք է իր ձայնը բարձրացնի սահմանադրության փոփոխության հանրաքվե անցկացնելու պահանջով՝ հրաժարվելով Ադրբեջանի տարածքային պահանջներից։ Խաղաղության պայմանագիրը թղթի կտոր չէ, այն պետք է երաշխիք լինի, որ Հայաստանում ոչ ոք չի դիմի ռևանշիզմի Ադրբեջանի դեմ, որը սպառնում է տարածաշրջանում խաղաղությանը»,- ասել է Ալիևի օգնականը։
Թարգմանությունը ՝ Էմմա Չոբանյանի
