14.02.2026 | 13:49
Աշտարակ համայնքին է վերադարձվել 4 հա մակերեսով հողամաս․ Դատախազություն
Գաղտնիք չէ՝ ՌԴ-ն ուզում է ՀՀ-ում իշխանություն փոխվի․ կապ եմ տեսնում ՌԴ-ի և զինված հեղաշրջում պատրաստած խմբի միջև․ Հասմիկ Հակոբյան. ՏԵՍԱՆՅՈՒԹ
Քաղաքականություն
27.09.2024 | 20:00
Չորս տարի առաջ այս օրը Ադրբեջանը պատերազմ սկսեց ԼՂ-ի դեմ, և 4 տարի անց 120 000 հայերը բռնի տեղահանված են, հազարավոր զոհեր ենք տվել, օկուպացված են ՀՀ-ի սուվերեն տարածքներ։ Բայց այսքան վնասներով հանդերձ՝ այսօր չկա խաղաղության պայմանագիր Ադրբեջանի հետ, ավելին՝ նրա պահանջներն օրեցօր ավելանում են։
ՀՀ ԱԺ «Քաղաքացիական պայմանագիր» խմբակցության պատգամավոր Հասմիկ Հակոբյանին Factor TV-ի հետ զրույցում հարց ուղղեցինք, թե արդյո՞ք սա չի փաստում կառավարության ձախողման մասին։
«Կարծում եմ՝ չորս տարին այդքան էլ երկար ժամանակ չէ խաղաղության պրոցեսի համար, որպեսզի սա ձախողում համարենք։ Ինտենսիվ աշխատում ենք և նպատակադրված ենք ունենալ այդ ցանկալի խաղաղությունը։ Կարծում ենք՝ դա ամենամեծ երաշխիքն է մեր անվտանգության»։
Այսօր ընդդիմությունը իշխանությանը մեղադրում է եթե կարճ՝ թուլամորթ լինելու մեջ, ինչի դրսևորումն, ըստ ընդդիմախոսների՝ Ադրբեջանի չդադարող պահանջներն են, խաղաղության բացակայությունը և այլն։ Եվ չնայած դրան՝ Ալիևը ՀՀ իշխանությանը ևս ռևանշիստ է կոչում, ասելով՝ զինվում է՝ ժամանակ ձգձգելով։ Մեղադրանքներից ո՞րն է ճիշտ։
«Դուք բերեցիք իրար հակասող երկու փաստ։ Մի կողմից ՀՀ ընդդիմությունն ասում է, որ մեր իշխանությունը թուլամորթ է, մյուս կողմից՝ Ադրբեջանը մեզ մեղադրում է զինվելու մեջ։ Այստեղ մնում է՝ ամեն մեկը հետևություն անի։ Ես կողմ չեմ լինելու ո՛չ առաջին, ո՛չ երկրորդ ծայրահեղությանը։ Ես մեր իշխանությանը թուլամորթ չեմ համարում։ Եթե խաղաղություն ցանկանալը թուլամորթություն է, ապա թող կոչեն ինձ թուլամորթ։ Զինվելն ու իր ինքնապաշտպանությունը կազմակերպել կարողանալն էլ ցանկացած երկրի իրավունքն է»,- նշեց իշխանական պատգամավորը։
Հարցազրույցն ամբողջությամբ՝ տեսանյութում։
