14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թուրքիայի ՊՆ-ն՝ ռուսական C-400-ներն ամերիկյան Ինջիրլիք ռազմաբազա տեղափոխելու մասին
Քաղաքականություն
26.09.2024 | 17:32
Թուրքիայի Պաշտպանության նախարարությունն արձագանքել է պնդումներին, որ ՌԴ-ից գնված «C-400 համակարգերը պահվելու են ԱՄՆ-ի վերահսկողության տակ Ինջիրլիք ռազմաբազայում՝ F-35-ի ծրագրում կրկին ներառվելու դիմաց»։
«Այս հարցում պետք է չվստահել երրորդ երկրների կողմից հնչող լուրերին, որոնք փորձում են ընկալում ստեղծել իրավիճակի վերաբերյալ։ Ներկայում C-400-ների և F-35-ի նկատմամբ երկու երկրների վերաբերմունքում փոփոխություն չկա։ Մենք միշտ հայտարարում ենք, որ դաշնակիցների կողմից միմյանց նկատմամբ սահմանափակումներ կամ պատժամիջոցներ կիրառելը ճիշտ չէ, դա հակասում է դաշինքի ոգուն։ Մեր ակնկալիքն այն է, որ մեր դաշնակիցները որոշումներ կընդունեն դաշինքի ոգուն և ընդհանուր անվտանգության հեռանկարին համապատասխան և կվերացնեն բոլոր անուղղակի կամ բացահայտ սահմանափակումները»,- թուրքական լրատվամիջոցների հաղորդմամբ՝ այս մասին ասել է ՊՆ աղբյուրը։
Հիշեցնենք, որ ավելի վաղ տեղեկություններ էին տարածվել, որ ամառվա ընթացքում ԱՄՆ-ը մանրամասն առաջարկ է ներկայացրել Թուրքիայի կողմից ռուսական C-400 հակաօդային պաշտպանության համակարգերի հարցի լուծման հետ կապված, որը պաշտոնապես թույլ կտա երկրին հրթիռները պահել իր տարածքում, բայց, ըստ էության, դրանց վերահսկողությունը փոխանցել Միացյալ Նահանգներին։
Հաղորդվում է, որ քննարկումներում ԱՄՆ բարձրաստիճան պաշտոնյաներն առաջարկ են ներկայացրել ռուսական համակարգերը Թուրքիայի հարավում գտնվող Ինջիրլիք բազայի՝ ԱՄՆ-ի կողմից վերահսկվող հատված տեղափոխելու վերաբերյալ:
Թարգմանությունը՝ Էմմա Չոբանյանի
