Հայաստանն արհեստականորեն ձգձգում է գործընթացը․ Ալիևը՝ հարաբերությունների կարգավորման մասին

Ադրբեջանի նախագահ Իլհամ Ալիևը երկրի 7-րդ գումարման Միլլի Մեջլիսի առաջին նիստում ունեցած ելույթում անդրադարձել է նաև Հայաստանի հետ հարաբերությունների կարգավորման գործընթացին։ Նա հայտարարել է, թե Հայաստանը, արհեստականորեն, ձգձգում է հարցի լուծումը։

«Մինչ օրս մեր առաջին նախագիծը Հայաստան ուղարկվելուց հետո եղել է 10 մեկնաբանությունների փոխանակում։ Ամիսների ընթացքում մենք, բնականաբար, ակնկալում էինք, որ Հայաստանն ավելի օպերատիվ և արագ կերպով կտա մեզ իր մեկնաբանությունները: Բայց մենք տեսանք ճիշտ հակառակը։ Նրանցից վերջին տարբերակը ստանալու համար ստիպված էինք սպասել 70 օր։ Բոլոր չհամաձայնեցված դրույթները հանվել են խաղաղության պայմանագրի իրենց տարբերակից։ Այսինքն՝ նման պարզունակ ու ոչ ադեկվատ քայլն անսպասելի էր»,- ասել է Ալիևը։

Ըստ նրա՝ մի շարք կետեր, իբր, «հիմք են տալիս ասելու, որ Հայաստանն իրականում խաղաղություն չի ուզում, այլ ցանկանում է ժամանակ ձգել»։

Ադրբեջանի թիվ մեկ խնդիրը երկրի ռազմական հզորացումը համարող Ալիևը կրկին բողոքել է Հայաստանի սպառազինումից՝ նշելով, թե, իբր, «Հայաստանն օգտագործում է զենքի համար նախատեսված Խաղաղության հիմնադրամը և անվճար զենք է գնում Ֆրանսիայից, ինչը լուրջ խնդիր է»։

«Նրանք, որոնք զինում են Հայաստանին, պետք է իմանան, որ իրենք են անմիջական պատասխանատվություն կրելու հետագա բոլոր իրադարձությունների համար։ Բնականաբար, մեր նկատմամբ պաշտոնական տարածքային պահանջները պետք է դադարեցվեն։ Նրանց Սահմանադրությունը պետք է փոփոխվի, Մինսկի խումբը վերացվի»,- հայտարարել է Ալիևը։

Ի դեպ, նկատենք, որ Հայաստանը Ֆրանսիայից անվճար զենք չի ստանում, այլ վճարում է իր պատվերների՝ համաձայն կողմերի միջև կնքված պայմանագրերի։

Թարգմանությունը՝ Էմմա Չոբանյանի