15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
TikTok-ը Հ1-ը դասակարգում է որպես պետական վերահսկողության տակ գտնվող մեդիա, ինչպես ռուսական ԶԼՄ-ների դեպքում
Հասարակություն
21.09.2024 | 19:23
TikTok սոցալական ցանցը հատուկ ընդգծմամբ տեղեկացնում է, որ Հայաստանի «Առաջին ալիքը» պետական վերահսկողության տակ գտնվող մեդիա է։ Այս մասին Factor.am-ը տեղեկանում է «Առաջին ալիք»-ի տիկտոկյան էջից։
Սոցիալական հարթակները, մասնավորապես, Facebook-ը, ռուս-ուկրաինական պատերազմի ընթացքում լսարանին որոշեցին տեղեկացնել, որ ռուսական լրատվամիջոցները վերահսկվում են ՌԴ իշխանության կողմից։ Նպատակը օգտատերերին քարոզչությունից զերծ պահելն է։
Հայաստանի դեպքում այս ընդգծման վերաբերյալ TikTok-ի կողմից պարզաբանումներ չկան։ Միաժամանակ Factor․am-ը ուսումնասիրել է Հանրային հեռուստաալիքների էջերը Facebook-ում, որտեղ, ի տարբերություն TikTok-ի, վերոնշյալ ընդգծումը չկա։ Այս նշումը TikTok-ում հավանաբար պայմանավորված է այն հանգամանքով, որ Հայաստանն ու ՌԴ-ն համարվում են դաշնակիցներ։
Factor.am-ը ուսումնասիրել է նաև Բելառուսի և Ղազախստանի պետական հիմնական հեռուստաալիքների էջերը, որտեղ ևս նշված է կառավարության կողմից վերահսկվելու փաստը։ Նշենք, որ այս երկրները, ինչպես նաև ՀՀ-ն, ՌԴ-ի հետ ՀԱՊԿ-ի և ԵՏՄ-ի կազմում են։ Իսկ ահա, օրինակ, Վրաստանի «Առաջին ալիքի» տիկտոկյան էջում նման նշում չկա։
Factor.am-ը համացանցում առկա տեղեկատվության հիման վրա զուգահեռներ է տարել Հայաստանի և Վրաստանի առաջին ալիքների կառավարման և ֆինանսավորման մեխանիզմների միջև։ Այս երկու ընկերությունները կառավարվում են նույն մեթոդներով՝ խորհուրդների կողմից և կառավարության ֆինանսավորմամբ։ Այս դեպքում հարց է առաջանում՝ ինչո՞ւ է Հայաստանի դեպքում նշվում, իսկ Վրաստանի դեպքում չի նշվում։ Հայաստանի պարագայում պատճառը, հավանաբար, ՌԴ-ի հետ ունեցած կապերն են։
Factor.am-ը թեմայի վերաբերյալ փորձեց մեկնաբանություն ստանալ Հանրային հեռուստաընկերությունից։ «Առաջին ալիք»-ի գործադիր տնօրեն Հովհաննես Մովսիսյանն առանց հարցը լսելու առաջարկեց մեկնաբանություն ստանալ ընկերության մամուլի հետ կապերի բաժնից, որտեղից էլ առայժմ պարզաբանում չենք ստացել։
Նարեկ Կիրակոսյան
