14.12.2025 | 15:17
Ուկրաինան հարվածել է Ուրյուպինսկի նավթաբազայի և Յարոսլավլի նավթավերամշակման գործարանին
Գիտնականները պարզել են, որ COVID-19-ը տարածվել է չինական Ուհանի շուկայից
Քաղաքականություն
20.09.2024 | 21:51
Կորոնավիրուսի տարածումը սկսվել է Չինաստանի Ուհան քաղաքի Հուանան շուկայից՝ համաձայն միջազգային հետազոտության։ Այն պատրաստել են 23 գիտնականներ, այդ թվում՝ ԱՄՆ-ից և Մեծ Բրիտանիայից։
Cell ամսագրում հրապարակված հետազոտության համաձայն՝ COVID-19-ով առաջին հիվանդներից շատերը աշխատել կամ այցելել են Հուանան ծովամթերքի մեծածախ շուկա: Շուկայի կապը վիրուսի տարածման հետ առաջին անգամ հաստատել են քաղաքի տարբեր հիվանդանոցների բժիշկները, նշում են գիտնականները։
2019 թվականի դեկտեմբերին ընդունված 174 հիվանդների 32%-ը «հաստատված կապ է ունեցել այդ վայրի հետ»։ Բացի այդ, թոքաբորբից մահացության ավելցուկային դեպքեր առաջին անգամ արձանագրվել են այս շուկայի շրջակա քաղաքներում:
«Հուանան շուկան այն վայրն էր, որտեղ ամենաշատ վայրի կենդանիներն էին վաճառվում ավելի քան 12 միլիոն բնակչություն ունեցող Ուհանում: 2019 թվականի աշնան վերջին մի քանի վաճառողներ փաստագրել են, որ ապօրինի կերպով վաճառում էին կենդանիներ, այդ թվում՝ ջրարջեր, առնետներ, մալայական խոզուկներ, ամուրյան ոզնիներ և ասիական փորսուղներ: Վայրի կենդանիներ վաճառողների մեծ մասը գտնվում էր շուկայի արևմտյան թևում, որտեղ հայտնաբերվել է վարակի ամենավաղ դեպքը, և որը կազմում էր շուկայի հետ կապ ունեցող COVID-19 դեպքերի մեծ մասը»,- ասվում է հետազոտության մեջ:
Գիտնականները հայտնաբերել են կորոնավիրուսի տարածման երկու հնարավոր տարբերակ՝ կա՛մ կենդանիներից մեկից (որ տեսակից՝ հնարավոր չի եղել պարզել) մարդկանց, կա՛մ այն շուկա են բերել հենց մարդիկ։
Առողջապահության համաշխարհային կազմակերպությունը (ԱՀԿ) նշել է կորոնավիրուսի ծագման ամենահավանական վարկածը՝ դրա փոխանցումը չղջիկներից միջանկյալ կենդանու միջոցով։ ԱՀԿ-ն նաև չի հաստատել վիրուսի լաբորատոր ծագումը։
Միացյալ Նահանգները խոսել է COVID-19-ի լաբորատոր ծագման ապացույցների առկայության մասին, սակայն ամերիկյան հետազոտական հանրությունն ընդհանուր եզրակացության չի եկել։
Թարգմանությունը՝ Տաթև Ֆռանգյանի
