30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Թուրքիան հեղուկ գազի մատակարարման պայմանագիր է ստորագրել ֆրանսիական TotalEnergies-ի հետ
Քաղաքականություն
18.09.2024 | 22:18
Թուրքիայի էներգետիկայի նախարար Ալփարսլան Բայրաքթարը հայտարարել է ֆրանսիական TotalEnergies ընկերության հետ հեղուկ բնական գազի մատկարարման 10-ամյա պայմանագրի կնքման մասին։ Այս մասին թուրք նախարարը հայտնել է X-ում գրառմամբ։
Նա հայտնել է, որ թուրքական պետական նավթագազային BOTAŞ ընկերության և TotalEnergies-ի միջև համաձայնագիրը ստորագրվել է ԱՄՆ Թեխաս նահանգի Հյուսթոն քաղաքում անցկացվող Gastech արդյունաբերական համաժողովի շրջանակում։
«10-ամյա գործարքը կմեկնարկի 2027 թվականին և կմատակարարի տարեկան մինչև 1,6 միլիարդ խորանարդ մետր ծավալով հեղուկ գազ։ Երկարաժամկետ LNG համաձայնագրերը մեծ նշանակություն ունեն ինչպես մեր երկրի, այնպես էլ մեր տարածաշրջանի էներգամատակարարման անվտանգության ապահովման, մեր ռեսուրսների բազմազանության մեծացման և մեր էներգամատակարարման ճկունության ապահովման համար: Ուզում եմ, որ համաձայնագիրը շահավետ լինի և՛ ընկերությունների, և՛ մեր երկրի համար»,- գրել է Բայրաքթարը։
Թուրքիան բնական գազ է ներկրում Ադրբեջանից, Իրանից և Ռուսաստանից։ Ստանալով իր գազի գրեթե կեսը Ռուսաստանից՝ Թուրքիան նաև հեղուկ գազ է գնում մատակարարներից, այդ թվում՝ Կատարից, Նիգերիայից, Ալժիրից և ԱՄՆ-ից:
Թարգմանությունը՝ Էմմա Չոբանյանի
