07.10.2026 | 20:18
Ավինյանի խոստումից 4 ամիս անց․ ինչու է դադարել Արին Բերդի փողոցի 1 մլրդ դրամանոց հիմնանորոգումը. ՏԵՍԱՆՅՈՒԹ
Թյուրքական պետությունների կազմակերպության երկրների նախարարներն էներգետիկ համագործակցության ծրագրեր են քննարկել
Քաղաքականություն
16.09.2024 | 21:42
Ղրղզստանի մայրաքաղաք Բիշքեկում տեղի է ունեցել Թյուրքական պետությունների կազմակերպության անդամ երկրների էներգետիկայի նախարարների 4-րդ հանդիպումը, գրում է Անադոլուն։
Նիստին մասնակցել են Ադրբեջանի, Ղազախստանի, Թուրքիայի, Ուզբեկստանի, Ղրղզստանի էներգետիկ գերատեսչությունների ղեկավարներն ու ներկայացուցիչները, ինչպես նաև դիտորդներ Թուրքմենստանից և Հունգարիայից։
Հանդիպման ընթացքում քննարկվել են էներգետիկայի ոլորտում համագործակցության հարցեր, այդ թվում՝ Նախիջևանի համաձայնագրով նախատեսված խնդիրների իրականացումը, մինչև 2040 թվականը թյուրքական աշխարհի զարգացման հայեցակարգը և 2023-2027 թվականների էներգետիկ համագործակցության գործողությունների ծրագիրը։
Նախարարները հատուկ ուշադրություն են դարձրել կանաչ էներգիայի զարգացմանը, տեխնոլոգիաների և կանաչ նախաձեռնությունների տարածաշրջանային կենտրոնի ստեղծմանը, ինչպես նաև էներգետիկայի ոլորտի աշխատողների մասնագիտական հմտությունների ամենամյա մրցույթներին։ Առաջարկվել է մասնագիտական հմտությունների առաջին մրցաշարն անցկացնել Ղրղզստանում։
Մասնակիցները պատրաստակամություն են հայտնել շարունակել համագործակցությունը էլեկտրաէներգիայի փոխանակման և մատակարարման ոլորտում, ինչպես նաև ընդգծել էներգաարդյունավետության կարևորությունը՝ որպես էներգետիկ անվտանգության ապահովման առանցքային գործիք։
Հանդիպման արդյունքներով ստորագրվել է համատեղ կոմյունիկե էներգետիկայի ոլորտում համագործակցության հետագա ամրապնդման վերաբերյալ։
