Ադրբեջանի ԿԸՀ-ն հաստատել է խորհրդարանական ընտրությունների արդյունքների արձանագրությունը

Ադրբեջանի Կենտրոնական ընտրական հանձնաժողովն այսօրվա նիստում հաստատել է 7-րդ գումարման Միլլի Մեջլիսի ընտրությունների ընդհանուր արդյունքների մասին արձանագրությունը և հարցը փոխանցել Սահմանադրական դատարանի հաստատմանը, գրում են ադրբեջանական լրատվամիջոցները։

ԿԸՀ ղեկավար Մազահիր Փանահովի խոսքով՝ կառույցն անվավեր է ճանաչել 46 ընտրատեղամասերի արդյունքները։ Միաժամանակ, լուծարվել են 17 ընտրատարածքների 35 տեղամասային ընտրական հանձնաժողովները։ 46 ընտրատեղամասերում ընտրությունների արդյունքների չեղարկումը չի ազդել հայտարարված նախնական արդյունքների վրա։ Այսինքն՝ պատգամավոր են ճանաչվում բոլոր նրանք, ում տեղամասերում արձանագրվել են կեղծիքներն ու խախտումները։

125 պատգամավորներից 81-ը 11 քաղաքական կուսակցության անդամ են։

Օրենքի համաձայն՝ Սահմանադրական դատարանը 10-օրյա ժամկետում պետք է ստուգի ընտրությունների արդյունքները և հաստատի դրանք։

Հիշեցնենք, որ Մեջլիս են անցել Ադրբեջանի նախագահ Իլհամ Ալիևի ղեկավարած «Նոր Ադրբեջան» կուսակցության 68 անդամները, ևս 44 մանդատ ստանում են, այսպես կոչված, անկախները, որոնք սերտ կապեր ունեն իշխանությունների հետ։

«Քաղաքացիական համերաշխություն» կուսակցությունը կունենա 3 պատգամավոր (Ֆազաիլ Իբրահիմլի, Ռաֆայել Հուսեյնով և Թանզիլյա Ռուստամխանլի), «Արդարության, իրավունքի և ժողովրդավարության» կուսակցությունը՝ 2 (Գուդրաթ Հասանգուլիև և Էլչին Միրզաբեյլի), մեկական պատգամավոր կունենան Հանրապետական ​​այլընտրանք (Էրկին Գադիրլի), Ազգային անկախություն (Արզուխան Ալիև), Ժողովրդավարական բարեփոխումների (Ասիմ Մոլլազադե), «Հայրենիք» (Գյունայ Աղամալի), Մեծ արարման (Ֆազիլ Մուստաֆա), Մեծ Ադրբեջան (Էլշադ Մուսաև), Ազգային ճակատ (Ռազի Նուրուլլաև), Ադրբեջանի Ժողովրդավարական կրթության (Էլշան Մուսաև) կուսակցությունները։