Ալիևի կուսակցությունը բացարձակ մեծամասնությունն է ստացել Մեջլիսի ընտրություններում

Հրապարակվել են սեպտեմբերի 1-ին Ադրբեջանում կայացած արտահերթ խորհրդարանական ընտրությունների նախնական արդյունքները։ Ադրբեջանի Կենտրոնական ընտրական հանձնաժողովի նախագահ Մազահիր Փանահովը հայտնել է, որ Իլհամ Ալիևի ղեկավարած «Ենի Ադրբեջան» կուսակցությունը Մեջլիսում 125 մանդատից ստանում  է 68-ը։ Իշխանամետ դիրքորոշմամբ հայտնի «անկախ» կուսակցությունները ստանալու են ևս 44 մանդատ։ Երեք պատգամավոր կլինի «Քաղաքացիական համերաշխություն» կուսակցությունից (Ֆազաիլ Իբրահիմլի, Ռաֆայել Հուսեյնով և Թանզիլյա Ռուստամխանլի) և երկուական պատգամավոր՝ «Արդարություն, իրավունք և ժողովրդավարություն» կուսակցությունից (Գուդրաթ Հասանգուլիև և Էլչին Միրզաբեյլի)։

Եվս 8 կուսակցություն՝ «Հանրապետական այլընտրանք» (Էրկին Գադիրլի), «Ազգային անկախության կուսակցություն» (Արզուխան Ալիզադե), «Դեմոկրատական ​​բարեփոխումների կուսակցություն» (Ասիմ Մոլլազադե), «Հայրենիք» կուսակցություն (Գյունայ Աղամալի), «Մեծ արարման» կուսակցություն (Ֆազիլ Մուստաֆա), «Մեծ Ադրբեջան» (Էլշադ Մուսաև),  «Ազգային ճակատ» կուսակցությունը (Ռազի Նուրուլլաև) և «Ադրբեջանի դեմոկրատական ​​լուսավորչական» կուսակցությունը (Էլշան Մուսաև) կունենան մեկական պատգամավորական մանդատ։

Փանահովը նաև հայտարարել է, որ ընտրողների մասնակցությունը կազմել է 37,27 տոկոս։ Ընտրողների թիվը 6 421 960 է, սակայն ընտրություններին մասնակցել է 2 միլիոն 196 հազար 771 մարդ։ Ընտրություններն անցկացվել են 125 շրջանի՝ 6478 ընտրատեղամասերում։ ԼՂ բնակավայրերում 54 ընտրատեղամաս է բացվել։

Մեջլիսի 125 տեղի համար պայքարում  էր 990 թեկնածու։ Ընդհանուր առմամբ, 25 կուսակցությունների ներկայացուցիչներ են մասնակցել ընտրություններին։   Ընդդիմադիր «Մուսավաթ» կուսակցությունը որևէ մանդատ չի ստանում ընտրությունների արդյունքում։ Կուսակցությունը նաև նախօրեին մի շարք հայտարարություններ էր տարածել՝ հայտնելով ընտրախախտումների մասին։ Հիշեցնենք, որ մեկ այլ ընդդիմադիր «Ժողովրդական ճակատ» կուսակցությունը բոյկոտել էր ընտրությունները։

Ընդդիմադիր կուսակցությունները և անկախ դիտորդները  հայտնում են քվեաթերթիկների լցոնման, կարուսելային քվեարկության, ընդդիմադիր թեկնածուների, դիտորդների և լրագրողների վրա հարձակումների դեպքերի մասին։ Համացանցում ակտիվորեն տարածվում են այդ խախտումները փաստող տեսանյութերը։

Էմմա Չոբանյան