Գալստանյանը հանդիպեց Քոչարյանին, Սարգսյանին․ բացահայտվեց սուտը, թե նախկինները շարժման հետ կապ չունեն. Էդգար Առաքելյան. ՏԵՍԱՆՅՈՒԹ

Ադրբեջանը հայտնեց, թե բանակցություններ է վարում Իրանի տարածքով հաղորդակցության ուղիների բացման համար։ Հաջիզադեն մեղադրեց ՀՀ-ին՝ նոյեմբերի 9-ի եռակողմ հայտարարությունը խեղաթյուրելու մեջ։ Նիկոլ Փաշինյանն էր երեկ ԱԺ-ում ասում, որ ոչ մի տեղ գրված չէ ՌԴ ԱԴԾ-ի կողմից անվտանգության ապահովման մասին։ Վարչապետն ասաց՝ ՀՀ-ն պատրաստ է անվտանգություն ապահովել, թող գան՝ անցնեն։ Եվ ՀՀ-ն պատրաստ է ներգրավել միջազգային կազմակերպության՝ հեշտացնելու անցումը։ Բաքուն պնդում է, որ «եթե Հայաստանը շարունակում է ինքնամեկուսացման քաղաքականությունը, ապա դա իր ընտրությունն է»։ Ինչո՞վ պայմանավորել վերջին օրերին ապաշրջափակման թեմատիկայի ակտիվացումը, հարց, որը քննարկեցին նաև Իրանի և ՌԴ ԱԽ քարտուղարները Սանկտ Պետերբուրգում։ «Ազատ Հայաստան» նախաձեռնության հիմնադիր Էդգար Առաքելյանը Factor TV-ի հետ զրույցում ասում է, որ Կրեմլը փորձեր է կատարում ՀՀ-ից ստանալ միջանցք․

«Նախկինում էլ նշել ենք, որ 2020 թվականի պատերազմը Ադրբեջանից ՀՀ-ի տարածքով դեպի Նախիջևան ռուսական միջանցք ունենալու մասին է եղել։ ՌԴ-ն լարեց կրքերը միջանցքի շուրջ վերջերս Բաքու Պուտինի այցով։ Սա միջանցք ստանալու փորձ է։ Դրա վերաբերյալ ՌԴ-ն և Ադրբեջանը ունեն պայմանավորվածություններ, որոնք չեն կատարվել։ Չի կատարվել այդ պայմանավորվածությունը՝ ոչ այնքան Ադրբեջանի, որքան ՌԴ-ի պատճառով։ Դա ստանալու համար ՌԴ-ն պիտի լարեր ՀՀ-ում ներքաղաքական իրավիճակը, ստեղծեր կիսառազմական իրավիճակ, Ադրբեջանը ներխուժեր, միջանցքը գրավեր և փաստը արձանագրվեր։ Եվ այդ սստատուս քվոյով բանակցությունը պիտի շարունակվեր։ Դա փաստացի տեղի չի ունեցել և մայիսին ընդդիմադիր շարժումը այդ տրամաբանության մեջ էր։ Պատահական չէ՝ Ադրբեջանը հենց Տավուշից սկսեց սահմանազատումը, քանի որ հենց Տավուշում ՀՀ-ն ուներ որոշակի տարածքներ հետ տալու, և դրա հիման վրա ՀՀ-ում պիտի տեղի ունենային ներքաղաքական լարումներ, որի արդյունքում նաև սահմանային լարումներ կլինեին։ Մենք տեսանք, որ այդ շարժումը ձախողվեց, և հետևաբար՝ ձախողվեց հիմնական պլանը»,- ասում է Առաքելյանը՝ ուշադրություն հրավիրելով այն հանգամանքի վրա, որ Հայաստանի և Իրանի բարձրաստիճան պաշտոնյաները օրերս միաժամանակ խոսեցին ռուս-ադրբեջանական միջանցքի անթույլատրելիության մասին։

Հարցազրույցն ամբողջությամբ՝ տեսանյութում։

Ռոբերտ Անանյան