26.12.2025 | 23:15
Ալիևն Արցախում իր ընտանիքին պատկանող հերթական հյուրանոցն է բացել
Բաքուն ԵՄ-ին մեղադրել է Ադրբեջանի «ներքին գործերին խառնվելու և զրպարտչական արշավի» մեջ
Քաղաքականություն
12.09.2024 | 15:55
ԵՄ-ի «կանխակալ և անարդար հայտարարությունները» դիտարկվում են որպես միջամտություն Ադրբեջանի ներքին գործերին։ Այս մասին ասվում է Ադրբեջանի ԱԳՆ խոսնակ Այխան Հաջիզադեի հայտարարության մեջ՝ ի պատասխան Բաքվի վերաբերյալ ԵՄ-ի հայտարարության։
Հաջիզադեն ասել է, թե Ադրբեջանի հասցեին «անհիմն հայտարարություններ անելու փոխարեն՝ ԵՄ-ն պետք է ուշադրություն դարձնի անդամ երկրներում մարդու իրավունքների խախտման դեպքերին»։
«ԵՄ-ն դեռ չի հետաքննել Ֆրանսիայում «դեղին բաճկոնների» ցույցերի ժամանակ ցուցարարների սպանությունները, անդրծովյան տարածքներում տեղի բնակչության նկատմամբ Ֆրանսիայի նեոգաղութային քաղաքականության հետևանքով խոշտանգումները, կաշառակերության և կոռուպցիայի տարածումը ԵՄ կառույցներում, իսլամատյացության և մուսուլմանների վրա հարձակումների փաստերը, և համարժեք դիրքորոշում չի ուրվագծել այս խնդիրների վերաբերյալ: Ցավով նշում ենք նաև, որ ԵՄ-ի անտարբերությունը եվրոպական կողմից հովանավորվող Հայաստանում մարդու հիմնարար իրավունքների և ազատությունների ոտնահարման, քաղաքական հետապնդումների հետևանքով բանտերում մահվան դեպքերի, ինչպես նաև քաղաքական գործիչների և նրանց ընտանիքների անդամների հետապնդումների նկատմամբ երկակի ստանդարտների վառ օրինակ են»,- ասվում է հայտարարության մեջ։
«Վերոնշյալի ֆոնին ԵՄ-ի կողմից նման կողմնակալ և անարդար հայտարարությունները դիտվում են որպես միջամտություն Ադրբեջանի ներքին գործերին։ Մասնավորապես, COP29 միջոցառմանն ընդառաջ Ադրբեջանի դեմ զրպարտչական արշավը մեր երկրի նկատմամբ կողմնակալության ակնհայտ ցուցիչ է: Ադրբեջանում մարդու բոլոր իրավունքները պաշտպանված են, ազատությունից զրկված անձանց պաշտպանությանը զուգընթաց՝ զգալի առաջընթաց է արձանագրվել համապատասխան պրակտիկան ընդհանուր ընդունված միջազգային չափանիշներին համապատասխանեցնելու գործում, և Եվրամիության մեղադրանքներն այս առումով լիովին անհիմն են»,- եզրափակել է Հաջիզադեն։
Հավելենք, որ ԵՄ վերոնշյալ հայտարարությանը միացել է նաև Հայաստանը։
