14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Այս ընտրություններում արդեն իսկ հետընթաց ունենք. Զարուհի Փոստանջյանը՝ տեսախցիկների բացակայության խնդրի մասին. ՏԵՍԱՆՅՈՒԹ
Քաղաքականություն
10.09.2018 | 14:58
Ազատ, արդար և թափանցիկ ընտրություններ կազմակերպելու համար քաղաքական կամք է պետք: Սեպտեմբերի 10-ին՝ քարոզարշավի առաջին օրը հրավիրած ասուլիսում այս մասին հայտարարեց Երևանի ավագանու ընտրություններում քաղաքապետի թեկնածու, «Երկիր Ծիրանի» կուսակցության ղեկավար Զարուհի Փոստանջյանը:
«Եթե չլինի իրավիճակը փոխելու քաղաքական կամք՝ և՛ իշխանության, և՛ հասարակության մոտ, մենք չենք կարող ոչինչ փոխել: Մենք կարող ենք կրկնել մեր անցած շուրջ 30-ամյա պատմությունը, չենք կարող պոկվել ավտորիտարիզմից և գնալ դեպի ժողովրդավարություն»,- կարծում է Զարուհի Փոստանջյանը:
Քաղաքապետի թեկնածուն ընտրախախտումներ արդեն նկատել է, բայց դեռ վաղ է համարում ասել՝ արդյոք դրանք կազդե՞ն ընտրությունների վրա: «Բացի այդ, նախորդ ընտրությունների համեմատ, այս անգամ հետընթաց ունենք: Դա ընտրատեղամասերում տեսախցիկների բացակայությունն է: Եթե նախորդ ընտրություններում մենք օնլայն կարողանում էինք հետևել և կարողացանք, օրինակ, արձանագրել, թե ինչպես են ընտրատեղամասից առևանգում չհրկիզվող պահարանը: Հիմա, փաստացի, դա մեզ համար հասանելի չի լինելու»,- ասաց Զարուհի Փոստանջյանը:
Լրագրողները հարցրեցին նաև այս ընտրություններում մրցակցության, «սևի և սպիտակի» մասին հայտարարություններին: «Քաղաքականությունը լուրջ գործունեություն է, պետք է հավասարակշռությունը պահես, խաղի չվերածես: Ես կողմնակիցն եմ, որ հանրությունը լինի բազմազան, և դա է ցանկացած գործի հաջողությունը»,- նշեց Զարուհի Փոստանջյանը:
