09.09.2026 | 19:16
Վանաձոր, Այրում քաղաքներում, Արարատ բնակավայրում գազանջատումներ կլինեն
Մարզադահլիճ, գրադարան, միջոցառումների դահլիճ․ միջազգային ստանդարտներին համապատասխանող 2 նոր մասնաշենք «Աբովյան» ՔԿՀ-ում․ ԼՈՒՍԱՆԿԱՐՆԵՐ
11.09.2024 | 17:15
Արդարադատության նախարար Գրիգոր Մինասյանը, ՀՀ-ում ԵՄ պատվիրակության ղեկավար Վասիլիս Մարագոսը և Մարդու իրավունքների պաշտպան Անահիտ Մանասյանը ներկա են գտնվել «Աբովյան» քրեակատարողական հիմնարկում վերակառուցված նոր երկու մասնաշենքի բացման արարողությանը․ տեղեկացնում են գերատեսչությունից։
Նախարար Գրիգոր Մինասյանն ընդգծել է, որ «Աբովյան» քրեակատարողական հիմնարկում մեկնարկած լայնածավալ շինարարական աշխատանքների արդյունքում կստեղծվի ամբողջությամբ վերանորոգված՝ միջազգային ստանդարներին համապատասխանող քրեակատարողական հիմնարկ:
Կատարված աշխատանքների արդյունքում ամբողջությամբ վերանորոգվել է կանանց տեղամասը, որը ներառում է հղի և մինչև 3 տարեկան երեխա ունեցող կանանց առանձնացված խցեր, ինչպես նաև ուսումնական կենտրոնը, որը ներառելու է մարզադահլիճ, գրադարան, լսարաններ, միջոցառումների դահլիճ և արհեստագործական ուսումնական սենյակներ:
«Աբովյան» ՔԿՀ-ում այժմ ընթանում են ևս երկու մասնաշենքերի՝ մեկուսարանի և վարչական հատվածի շինարարական աշխատանքները, որոնք նախատեսված են շահագործման հանձնել 2024թ.-ին:
Շինարարական աշխատանքների վերջին փուլը նախատեսվում է իրականացնել 2025թ.-ին, որի արդյունքում վերանորոգվելու է քրեակատարողական հիմնարկի ամբողջ տարածքը: Շինարարական աշխատանքները ներառելու են անչափահասների մասնաշենքը, քաղաքացիների ընդունելության սրահը, հանձնուքների ընդունման կետը, երկարատև և կարճատև տեսակցությունների սենյակները, քննչական և փաստաբանական գործողությունների սենյակները և հերթապահ մասը:
Արդարադատության նախարարը վստահություն է հայտնել, որ, Կառավարության նախաձեռնած բարեփոխումների արդյունքում, քրեակատարողական համակարգը էականորեն բարելավվում է, այս ճանապարհին ակնկալելով նաև գործընկերների աջակցությունը:
Միջոցառման ընթացքում Արդարադատության նախարար Գրիգոր Մինասյանը, ՀՀ-ում ԵՄ պատվիրակության ղեկավար Վասիլիս Մարագոսը և Մարդու իրավունքների պաշտպան Անահիտ Մանասյանը շրջայց են կատարել քրեակատարողական հիմնարկում, ծանոթացել ազատազրկված անձանց պահման պայմաններին:
